Izraelitët futen në spital në Bregun perëndimor, kirurgu: Urdhëruan mjekët të dalin jashtë!

Gjatë sulmit të ushtrisë izraelite në spitalin e Jeninit në Bregun perëndimor të okupuar janë vrarë të paktën tre palestinezë ndërsa 10 janë plagosur, ka konfirmuar kirurgu kryesor i spitalit për BBC.

“Tre të vdekurit kishin disa lëndime që flasin për shpërthime. Duket se disa të plagosur kanë lëndime nga shpërthimet ndërsa të tjerët nga plumbat. Dy prej tyre janë në rrezik për jetën,” tha Tawfeeq Al Shobaki.

Ushtria izraelite ka bërë të ditur se gjatë operacionit ka vrarë pesë sulmues të armatosur dhe ka konfiskuar gjashtë pushkë. Izraelitët pas sulmit të Hamasit më 7 tetor disa herë kanë sulmuar kampin e refugjatëve në Jenin. Para një jave janë vrarë të paktën 14 persona. 

Al-Shobaki thekson se forcat izraelite gjatë operacionit kanë arritur në hyrjen emergjente të spitalit Ibn Sina dhe kanë kërkuar nga personeli mjekësor të largohen nga spitali.

“Personeli mjekësor i shërbimit emergjent kanë refuzuar të largohen. Personeli i Gjysmëhënës së kuqe u urdhëruan të dalin jashtë me duar të ngritura lartë,” tha Tawfeeq Al Shobaki.