Ja kur do të nisë ndërtimi i rrugës Kardhiq-Delvinë

Në shtator të këtij viti do të nisë puna për ndërtimin e rrugës Kardhiq-Delvinë. Kjo u bë e ditur nga Kryeministri Edi Rama, gjatë një takimi në Karahaxh në Sarandë me pakicat kombëtare në kuadër të turit të llogaridhënies.

“Tanimë e famshmja rruga Kardhiq-Delvinë, që prej 20 e ca vitesh kanë ardhur e kanë premtuar këtu është në rrugën e bërjes realitet. Besoj se në shtator të këtij viti fillon puna dhe nuk do ndalet më, deri sa të përfundojë rruga”, theksoi Rama.

Në vijim, duke iu drejtuar banorëve, Rama u tha se “në shtator do të takohemi kur të nisin punimet për ndërtimin e kësaj rruge”.

Në buxhetin e vitit 2018 qeveria shqiptare ka parashikuar të financojë disa segmente rrugore.
Mes tyre është edhe rruga Kardhiq-Delvinë me një gjatësi rreth 34 km. Rruga pritet të shkurtojë me 3 orë kohën e udhëtimit nga Tirana në Sarandë, duke i dhënë një hov të mëtejshëm turizmit.