Ja me çfarë kriminel do hap Ballkanin Rama, edhe Drejtori i Vuçiçit mohon Reçakun
Drejtori i Zyrës për Kosovën pranë qeverisë së Serbis, Petar Petkoviç bëri të ditur sot se Ivan Todosijeviç ka marrë thirrjen për vuajtjen e dënimit pasi gjykata në Prishtinë e dënoi me 2 vjet burg sepse kishte mohuar masakrën e Reçakut.
“Në momentin kur po përballemi me një krizë serioze në veri të Kosovës, për shkak të lëvizjes së njëanshme dhe të dhunshme të Albin Kurtit, para së gjithash për sjelljen e njësisë speciale ROSU me armatim dhe mjete të blinduara në veri, në përpjekje për frikësuar popullsinë serbe, vjen goditja e re ndaj serbëve në Kosovë dhe presioni i ri nga Prishtina,” tha Petkoviç duke dalë në një konferencë të jashtëzakonshme për shtyp për të mos thënë asnjë fjalë të vërtetë, ndërsa iu bashkua krimit të Todosijeviçit duke mohuar edhe vetë ai masakrën e Reçakut.
“Ivan Todosijeviç mori ftesën që më 6 Tetor të lajmërohet në orën 12:00 në qendrën e paraburgimit në Mitrovicë për vuajtjen e dënimit prej dy viteve burg, pasi Gjykata e Apelit në Prishtinë konfirmoi vendimin e Gjykatës Themelore se Todosijeviç është fajtor, sepse tha të vërtetën për Reçakun,” tha Petkoviç duke shtuar se Todosijeviç si njeri i ndershëm u bë simbol i viktimizimit të popullit serb në Kosovë, dhe ky dënim është dënim i gjithë popullit serb në Kosovë.
Dhe jo vetëm kaq! Drejtori i Zyrës për Kosovën pranë qeverisë së Serbis, Petar Petkoviç, i cili vepron nën urdhrin direkt të Presidentit Vuçiç u tregua shumë më kriminel se Todosijeviç
“Dëshira e Prishtinës është që serbët të rrudhin krahët, të ulin kokën dhe të mendojnë ashtu siç dikton Prishtina. Kjo nuk do të ndodh. Të gjitha interpretimet e Prishtinës, populli serb nuk do ti pranoj. E vërteta mbi Reçakun është ajo të cilën e e mendon dhe e ndjenë çdo serb i ndershëm,” tha Petar Petkoviç duke rrënuar dhe gurin e fundit të Kryeministrit Edi Rama për “Open Balkan”, për të lënë të kaluarën dhe të shikohet nga e ardhmja! Pra, Drejtori i Vuçiçit dëshmon se serbët ishin, janë dhe mendojnë që edhe në të ardhmen të bëjnë masakra ndaj popullit shqiptar, e viktimat e tyre dhe bota, duhet ti besojnë vetëm një të vërtete, asaj serbe.
Ndryshe, më 24 mars të vitit 2019, Ivan Todosijeviç si ministër i Administratës dhe Pushtetit Lokal të Kosovës ishte shprehur në Zveçan se “Masakra e Reçakut ishte trillim. Janë terroristët shqiptarë që e trilluan gjithë këtë dhe bënë krimet më të mëdha në Kosovë,” për masakrën në të cilën forcat policore, ushtarake dhe paraushtarake serbe vranë 45 civilë shqiptarë në fshatin Reçak, ndonëse Kosova ishte nën vëzhgimin e rreptë të misionit të OSBE.
Një ditë pas kësaj masakre, Ambasadori i OSBE-së në Kosovë, William Walker, pasi vizitoi vendin e ngjarjes më 16 Janar, i tmerruar u shpreh: “Nga ajo që pashë nuk ngurroj të përshkruaj ndodhinë si masakër dhe krim kundër njerëzimit. Kjo është ngjarja më trishtuese në jetën time.”
Dhe, pas ekspertizës së kësaj masakre nga OSBE, opinionin ndërkombëtar u senzibilizua për të vërtetën dhe krimet serbe në Kosovë, dhe u hap edhe rruga e bombardimeve të NATO-s në Serbi.
