Jam i pafajshëm, Kuçi: Aktakuza prek dinjitetit tim njerëzor e profesional

Duke u deklaruar i pafajshëm lidhur me akuzat për pengim në administrim të drejtësisë nga Dhomat e Specializuara në Hagë, Ish-Ministri i Drejtësisë i Kosovës, Hajredin Kuçi, tha se dita e sotme është një prej momenteve më të errëta për të si njeri i drejtësisë, si profesor i drejtësisë, Ish-Zv/Kryeministër e ish-ministër i Drejtësisë për disa mandate.

“Më lejoni të jem i qartë, unë nuk kam bërë asnjë vepër penale, jam i pafajshëm dhe kam besim të plotë se do të lirohem nga akuzat. Në aktakuzë jam me presidentin Hashim Thaçi, më lejoni të them se Hashimin e kam mik, njihemi vite të gjata, dhe kemi punuar gjatë. Gjatë tërë punës së bashku kemi punuar dhe udhëhequr mbi parimin e drejtësisë, respektimit të saj dhe kemi besuar në drejtësi,” tha Hajredin Kuçi duke e quajtur aktakuzën e ngritur nga Prokuroria e Specializuar si prekje të dinjitetit të tij njerëzor, profesional dhe reputacionit të tij ndërsa siguroi se nuk është takuar me dëshmitarë sa ishte pjesë e ekipit mbrojtës të Kadri Veselit.

“Edhe në kohën sa isha në ekipin mbrojtës, edhe atëherë kur kam pas mundësi që përmes ligjit dhe protokollit të kësaj gjykate të takohem me dëshmitarët, këtë të drejtë nuk e kam shfrytëzuar asnjëherë, çka mund të vërtetohet. Nuk kam dashur që të fitohet perceptim për ndonjë keqkuptim eventual,” tha Kuçi.

Ndërkohë, aktakuzën ndaj tij e lexoi sekretarja e gjykatës sipas së cilës, ekziston dyshimi i bazuar mirë që Hajredin Kuçi mban përgjegjësi penale sipas nenit 163 të ligjit për kryerjen e veprës penale të mosbindjes së gjykatës në pikën 19, sipas nenit 17 të kodit penal të Kosovës, marrëveshje për kryerje me Hashim Thaçin të veprës penale të mosbindjes ndaj gjykatës në pikën 18 të kodit penal të Kosovës.

Ndërsa Prokurori i specializuar tha se ka dyshime që Hajredin Kuçi ka marrë detyrë nga Hashim Thaçi për të kontaktuar me dëshmitarët, mbi të cilën është ngritur aktakuza për mosbindje ndaj gjykatës.