Jam kërcënuar, Presidentja Osmani nuk dekreton Blerim Isufajn për Kryeprokuror të Kosovës

Presidentja Vjosa Osmani ka refuzuar të dekretojë kandidatin për Kryeprokuror të Kosovës, Blerim Isufajn, duke konstatuar shkeljet të cilat janë evidentuar gjatë procesit të përzgjedhjes.

“Sot e kam njoftuar Këshillin Prokurorial të Kosovës lidhur me këtë vlerësim të procedurës, i cili, duke pasur parasysh të gjitha shkeljet e bëra, më obligon që mos të bëj dekretimin e kandidatit për Kryeprokuror. Kam ftuar Këshillin Prokurorial që të ndjekë një procedurë kushtetuese e ligjore në përzgjedhjen e Kryeprokurorit të Shtetit, e cila është në funksion të mbrojtjes së integritetit dhe të funksionimit kushtetues të këtij institucioni, sikurse edhe rritjes së besimit të qytetarëve në drejtësinë,” tha Vjosa Osmani duke shtiar se shkeljet e evidentuara nga monitoruesit janë bërë publike nga organizatat monitoruese, Ambasada e SHBA, Ambasada e Gjermanisë dhe Zyra e Bashkimit Evropian në Kosovë.

Sipas Presidentes, shkeljet janë cilësuar si mungesë e drejtësisë, transparencës dhe parimeve të meritokracisë në Raportin e BE-së për Kosovën për vitin 2022.

“Kushdo që e lexon këtë dokument dhe e sheh se sa masive janë shkeljet në këtë procedurë nuk do ta merrte përsipër që ta dërgonte një vendim të tillë në Gjykatë Kushtetuese sepse nuk ka bazë ligjore për të kontestuar diçka që në fakt bëhet për të kthyer ligjshmërinë dhe kushtetutshmërinë në proces. Nëse deputetët për arsye politike zgjedhin një rrugë të tillë, ajo për mua është betejë politike e jo ligjore,” tha Osmani duke iu përgjigjur pyetjes rreth mundësisë së kundërshtimit nga opozita të mos dekretimit të Kryeprokurorit.

Me këtë rast Presidentja e Kosovë tha se ka pranuar kërcënime e presione të ndryshme për mos dekretimin e kandidatit Isufaj si Kryeprokuror.

“Në anën tjetër mund të ju them se ka pasur presione tjera të paligjshme për shembull njerëz që dërgonin mesazhe se nëse nuk e dekreton dhe nuk e nënshkruan do të bëjmë dosje, do të ngritim aktakuza, do t’i lidhim duart, por ata duhet ta dinë se kam më shumë se 2 dekada në politikë dhe se presionet s’kanë bërë punë e as nuk do të bëjnë tani,” tha Presidentja e Kosov, Vjosa Osmani duke përfunduar:

“Shqetësuese është kur zyrtarët e institucioneve tona të drejtësisë mendojnë që munden ta kërcënojnë kreun e shtetit në një vend demokratik, do të përfundonin jashtë sistemit. Por për fat të keq e kemi sistemin si e kemi, prandaj vetingu si proces është i domosdoshëm.”

Ndryshe, disa nga shkeljet që konstatoi Presidentja e Kosovës, Vjosa Osmani, në procesin e përzgjedhjes së kandidatit për kryeprokuror ishin shmangia e kritereve ligjore, mohimi i mundësisë për mjet ankimor efektiv brenda KPK-së për kandidatët e pakënaqur përmes refuzimit arbitrar të raportit të komisionit për rishqyrtim të kundërshtimeve, shkelje në procedurat e vlerësimit të reputacionit profesional të kandidatëve, shkelje në procedurat e vlerësimit të integritetit të kandidatëve, shkelje në procedurat e vlerësimit të koncept dokumentit dhe prezantimit të tij nga kandidatët, cenim i parimit të transparencës përgjatë procedurave të përzgjedhjes, cenimi i parimit të barazisë, cenimi i parimit të meritokracisë dhe e dhjetëra mungesa në dokumentacionin e dorëzuar nga KPK.