Japonezët janë të llastuar, Trump: Ata kanë nevojë për shumë oriz, dhe nuk e marrin!
Presidenti i SHBA-së, Donald Trump, ka shprehur dyshime rreth mundësisë së arritjes së një marrëveshjeje tregtare me Japoninë, një ditë pasi kërcënoi me tarifa më të larta për eksportet japoneze në SHBA, duke pretenduar se ky vend refuzon të blejë oriz amerikan.
“Kemi negociuar me Japoninë. Nuk jam i sigurt nëse do të bëjmë një marrëveshje, dyshoj,” u tha Trump gazetarëve në bordin e Air Force One. “Ata dhe të tjerët janë aq të llastuar pasi na kanë shfrytëzuar për 30 ose 40 vjet sa është shumë e vështirë për ta të bëjnë marrëveshje tani.”
Ndërsa afrohet 9 korriku, kur skadon një pauzë 90 ditore për “tarifat reciproke” të Trump, partnerët tregtarë të SHBA-së, përfshirë Japoninë, po përpiqen të arrijnë marrëveshje që shpresojnë se do ta kënaqin presidentin. Eksportet japoneze në SHBA u goditën me një tarifë prej 24 për qind kur Presidenti Trump nisi një ofensivë globale tarifore më 2 prill, përpara se të vendoste pauzën tremujor.
Trump tha se nuk kishte plane për ta zgjatur pauzën e tarifave përtej 9 korrikut. “Nuk po mendoj ta zgjas atë”, tha tha Presidenti Trump ndërsa iu referua nivelit të tarifave shtoi:
“Disa vende nuk do të jenë në gjendje as të tregtojnë me ne. Por në shumicën e rasteve, ne do ta përcaktojmë shumën.”
Akuzon Japoninë se nuk blen oriz amerikan
Të hënën, Trump përmes rrjeteve sociale për herë të parë akuzoi Japoninë se nuk blen oriz amerikan. Megjithatë, sipas Entit të Statistikave në SHBA, rezulton se vitin e kaluar Japonia ka importuar oriz me vlerë 298 milionë dollarë nga Shtetet e Bashkuara. Nga janari deri në prill të këtij viti, ajo bleu oriz me vlerë 114 milionë dollarë.
Pavarësisht kësaj, Trump përsëriti të njëjtin pretendim të martën.
“Ata kanë nevojë për kaq shumë oriz dhe nuk do ta marrin,” tha ai duke shtuar gjithashtu se japonezët nuk po blejnë makina amerikane, duke pretenduar: “Ne nuk u kemi shitur asnjë makinë në 10 vitet e fundit.”
Por, sipas Shoqatës së Importuesve të Automobilave në Japoni, Japonia importoi 16.707 automjete amerikane vitin e kaluar. “Ajo që do të bëj është t’u shkruaj një letër duke i falënderuar dhe duke u thënë se e dimë që nuk mund të bëjnë atë që po kërkojmë, kështu që do të paguajnë 30 për qind, 35 për qind ose çfarëdo që vendosim ne,” tha Trump.
Zv/Sekretari japonez i kabinetit, Kazuhiko Aoki, tha se negociatat me palën amerikane po vazhdonin. Ai tha se qeveria ishte në dijeni të pretendimeve të Trump, por nuk donte t’i komentonte ato.
“Japonia do të vazhdojë të zhvillojë bisedime serioze dhe të sinqerta për të arritur një marrëveshje që do të jetë në interes të të dyja palëve,” tha Aoki.
Bisedimet tregtare midis Japonisë dhe SHBA-së kanë ngecur kryesisht për shkak të tarifave mbi makinat, të cilat janë thelbësore për ekonominë japoneze. Japonia kishte shpresuar që SHBA-të do të ulnin tarifën prej 25 për qind mbi makinat, por Trump nuk lëvizi nga qëndrimi i tij. Në mesin e qershorit, kryeministri japonez Shigeru Ishiba u takua me Trump në kuadër të Samitit të G7. Ata ranë dakord të vazhdonin negociatat, por takimi nuk çoi në ndonjë përparim konkret.
