Javë vendimtare, Johannes Hahn: Punoni së bashku për stabilitet dhe…
Në kulmin e krizës politike të cilën vetë kryeministri Edi Rama e injoron, në këto javë vendimtare, përpara raporteve të zgjerimit të Komisionit Evropian në pranverë, Komisionieri për Negociatat e Zgjerimit dhe Fqinjësisë pranë BE, Johannes Hahn, bën apel që të gjitha forcat politike të punojnë së bashku për stabilitet dhe reformat e integrimit
“Është mirë të flasësh me njeriun tonë në Shqipëri, Ambasadorin Soreca, përpara raporteve të zgjerimit të Komisionit Evropian në pranverë. Çështje thelbësore është që të gjitha forcat politike në vend të punojnë së bashku për stabilitet dhe për reformat, këto javë vendimtare, në interes të qytetarëve të tyre,” thekson Johannes Hahn përmes rrjetit social Twitter, në apelin e shoqëruar me foton nga takimi me Ambasadorin e BE në Tiranë, Luggi Soreca.
Ndërkohë Ambasadori i BE në Tiranë, Luiggi Soreca, gjatë takimit të tij në Këshillin e Bashkimit Evropian, sot ka diskutuar ndër të tjera për ecurinë e reformave në Shqipëri.
Përmes rrjetit social Twitter, Ambasadori Soreca bënë të ditur se është diskutuar për gjendjen e zbatimit të reformave kyçe dhe situatën politike aktuale në vend.
“Sërish në Bruksel, në Këshillin e Bashkimit Evropian për të diskutuar me Shtetet Anëtare në #COWEB gjendjen e zbatimit të reformave kyçe dhe situatën politike aktuale në Shqipëri. Në pritje të Raportit Vjetor të Komisionit Evropian dhe vendimit të qershorit nga Këshilli për hapjen e negociatave për anëtarësim,” thekson Ambasadori i BE në Tiranë, Luiggi Soreca.
