“Jelekët e Verdhë“: Notre Dame nuk është problemi i vetëm i Francës!

Protestuesit “Jelekët e Verdhë“ kanë ndezur zjarre simbolike përgjatë marshit në Paris, si mesazh për presidentin Emmanuel Macron se rindërtimi i katedrales Notre Dame, nuk është problemi i vetëm që Franca duhet ta zgjidhë, raporton RFE.

Sikur uniformat që mbajnë protestuesit për të rënë në sy, zjarret simbolike raportohet se janë bërë për të tërhequr vëmendjen e presidentit nën moton “Më shiko edhe mua – edhe unë kam nevojë për ndihmë”.

Policia ka hedhur ujë dhe gaz lotsjellës në drejtim të protestuesve për të vënë nën kontrollë situatën.

Protestuesit kanë shënuar fundjavën e 23-të të aksionit “Jelekët e Verdhë“ kundër qeverisjes së Macronit, të cilën ata e shohin favorizuese ndaj të pasurve dhe bizneseve të mëdha. Protestuesit në Francë thonë se e përfaqësojnë punëtorin, studentin, penzionerin si dhe janë dëmtuar nga papunësia e lartë dhe taksat e larta në vend.