Jens Stoltenberg, Guvernator i ri i Bankës Qendrore të Norvegjisë

Sekretari i Përgjithshëm i NATO-s, Jens Stoltenberg, do të bëhet Guvernator i ri i Bankës Qendrore të Norvegjisë, tha sot qeveria norvegjeze pavarësisht shqetësimeve të opozitës se emërimi i Ish-Kryeministrit mund të dobësojë pavarësinë e këtij institucioni.

Stoltenberg, përpara se të nisë punën në drejtim e Bankës Qendrore të Norvegjisë tha se do të përfundojë mandatin e tij në NATO që mbaron në fund të muajit shtator të këtij viti.

Jens Stoltenberg do të jetë përgjegjës për përcaktimin e normave të interesit dhe menaxhimin e stabilitetit financiar, si dhe mbikëqyrjen e fondit të pasurisë sovrane të Norvegjisë, më i madhi në botë me asete prej 1.4 trilion dollarësh.

“Unë kam qenë shumë i shqetësuar në procesin e identifikimit të guvernatorit më të mirë të Bankës Qendrore të Norvegjisë dhe jam i bindur se ky është Jens Stoltenberg,” tha ministri i Financave, Trygve Slagsvold Vedum, raporton Reuters.

Para se të bëhej Sekretar i Përgjithshëm i NATO-s, Jens Stoltenberg me profesion ekonomist ishte Kryetari i Partisë Laburiste, ministër i Financave, ministër i Energjisë dhe kryeministër i Norvegjisë në periudhat 2000-2001 dhe 2005-2013.

Zv/Guvernatorja e Bankës Qendrore dhe rivalja kryesore e Stoltenbergut për këtë post, Ida Wolden Bache, raporton RFE, do të jetë Guvernatore në detyrë derisa Stoltenberg të marrë zyrtarisht detyrën, tha Qeveria e Norvegjisë.