Jo Dvoranin, Rama: Unë mezi po pres ta shohë para SPAK-ut, Ilir Metën!

Kryeministri Edi Rama e don Presidentin e Republikës, Ilir Meta, para SPAK-ut dhe jo shërbëtorin e Partisë së Punës Socialiste, Ardian Dvorani, ndryshe i bënë të qartë nga Asambleja e PS, atij të cilin e ka vënë në krye të Prokurorisë së Posaçme, të merret dhe me Ish-Presidentin Sali Berisha sepse durimi i tij po soset: I imi po e po, por edhe i juaji! Zonja dhe zotërinj të SPAK zgjohuni dhe dilini në mbrojtje Shqipërisë se Shqipëria është e turpëruar para një non grata që i bën karshillik një bote!

Ndërkohë para Asamblesë së PS foli dhe për zgjedhjet e reja të kryetarëve të Partisë Socialiste në 61 bashki dhe Programin e partisë

“Ne duhet të shkojmë pa humbur kohë në bashkëdrejtimin e partisë në nivelin bashkiak e më tutje me të parë e me të bërë sipas rezultateve e sipas analizave që do pasojnë. Përtej procesit e procedurës me rëndësi të mbahet parasysh se kjo nuk është një zgjedhje e radhës në PS, por zgjedhje me një rëndësi të madhe strategjie për të ardhmen e PS. Jo vetëm për zgjedhjet e ardhshme vendore për të cilat ne e kemi nisur punën e të cilave do i kushtojmë vëmendjen e të gjithë pjesës së dytë të këtij viti e pjesës së parë të vitit në vijim, por me rëndësi të madhe për vitet që vijnë për të gjithë këtë dekadë se është domosdoshmëri t’i japim drejtimit një impuls të ri e profil të ri politik që na mungon për hir të të vërtetës.

Një profil të ri që na siguron që partia ka zë në territor e ku kryetari i partisë s’janë as hije të kryetarëve të bashkisë as konkurrentë, as burokratë që bëjnë politikën e kuadrit të qeverisë, as zyrtarë që merren me punësime, por janë zëdhënës politikë të PS. Janë njerëz që përcojnë zërin e PS në territor, organizojnë komunikimin e partisë në territor e dinë të ballafaqohen me njerëzit me modesti e argumente, që i prijnë PS pa pasur agjenda të tjera e që janë shtrati i ri politik i PS të të nesërmes. Ndaj për këtë arsye procesi duhet të jetë i vërtetë e i përpiktë në gjithë hapat e vet. Duhet të shmanget cdo lloj formalizmi në këtë proces, duhet që Asambletë e partisë të jenë aktive por mos kenë monopolin e procesit, të shmangen nxjerrjet në ballë të drejtuesve të partisë që janë rezultat i konflikteve apo i përplasjes për të ndryshuar ekuilibrin e forcave mes grupeve të ndryshme. Në këtë proces na duhet një zgjedhje e cila të garantojë një transformim të PS, që është i domosdoshëm për të përballuar sfidën e së nesërmes e garantuar vazhdimësinë e PS si forcë qeverisëse, ky është thelbi. Garancinë për të qeverisur më tutje nuk na e japin punësimet në shtet. E kam thënë pavarësisht se rezistenca e brendshme në këtë drejtim vazhdon,” tha Edi Rama duke e bërë të qartë se duhet bërë një organizim i partisë dhe se garancia për të marrë sërish pushtetin është që PS të qëndrojë në territor, dhe këtë socialistët duhet ta kuptojnë përpara se të përfundojnë si kundërshtarët e tyre politikë.

“Garancinë për të qëndruar më tutje në krye të vendit, është në PS që na përfaqëson në territor me dinjitet, pa harruar asnjëherë që votuesit janë 600-700 mijë. Është e rëndësishme ta kuptojmë para se të jetë vonë dhe larg qoftë të përfundojmë si kundërshtarët tanë, që ja ku janë sot. Kjo është pjesa më e rëndësishme këtyre dy muajve për të pasur në fund të qershorit një grup kandidaturash për 61 bashki që përmbush këtë qëllim dhe në shtator të vijojmë me të njëjtën mënyrë për kandidaturat për njësitë bashkiake. Duhet të fokusohemi tek efektiviteti apo tek fosilizimi i një sërë organizatash që vazhdojnë të qëndrojnë për inerci dhe nuk japin produktin e kërkuar.” 

Dhe, sërish akuza kundër SPAK, por tashmëshmë para Asamblesë së PS shumë më i qartë pse gjithë ky zemërim: Prokuororia e Posaçme po heton shërbëtorin e Partisë së Punës Socialiste, Ardian Dvorani! E zemërimi bëhet më i ashpër kur bëhet e ditur se ai po hetohet pas akuzave të Presidentit të Republikës, Ilir Meta

“Nëse nuk do të isha ende në pritje që SPAK-u të bëjë ca punë më të mëdha dhe të vendosë një rend prioritetesh në këtë vend, mbase do të isha unë që do të bëja denoncime, por nuk kam sesi t’ia shtoj punët SPAK-ut, kur shoh se si balanca, jo në aspektin politik, por në aspektin e së drejtës është ende shumë e shtrembëruar. Në Kongres solla shembullin e arkës së peshkut. Këtu, një tjetër. A e dini që SPAK ka pasur shpejtësinë e rrufeshme dhe gadishmërinë e jashtëzakonshme për të vepruar minutë për minutë që të bllokojë Ardian Dvoranin njeriun e vlerësuar nga Sekretari i Shtetit si një ndër kampionët në luftën globale kundër korrupsionit, që të mos e lejonte të hynte në proces për t’u promovuar si gjykatës. SPAK-u, në mënyrë të rrufeshme: A thua se ishte i koordinuar si sahat zvicerian me atë zotërinë, që për pak ditë apo javë më në fund do të largohet nga zyra e Presidentit të Republikës. Çështje në hetim, gjë të cilën më pas procesi gjyqësor e çmontoi dhe e shfryu si flluskë sapuni.

Por nëse ku sahat zvicerian do ishte vërtet i pakonkurueshëm në precizionin e tij, sa gjykatës e sa prokurorë të xnjerrë nga vetingu për pasuri të pajustifikueshme do ishin sot në burg. Se u bë kohë që peshkaqenët e mëdhenj të sistemit të drejtësisë, vetingu i ka flakur jashtë. Ku janë ata sot? Janë në punën e tyre. Asnjë gjemb në këmbë nuk i ka hyrë ndërkohë që BE i ka lënë me shkrim të vazhdojë procesin dhe në momentin që Shqipëria do të ulet në procesin e negociatave gjëja e parë që do t’i thuhet është: na tregoni pak sa prokurorë dhe gjykatës janë çuar para drejtësisë? Zero! E kundërta është e vërtetë.

Kampioni i antikorrupsionit me vulë të Sekretarit të Shtetit është nën hetim nga SPAK. Për çfarë? Me denoncim të kujt? Për një denoncim, të atij që jo unë, por e gjithë Shqipëria mezi po pret ta shohë para SPAK-ut, të ilir Metës,” tha Kryeministri dhe po të mos e lakonte emrin e Ish-Presidentit të Republikës, Sali Berisha nuk do të quhej Edi Rama:

“Për të mos folur për këtë non gratën e madhe që e kemi në mes të sheshit bashkë me shpurën e tij që na thotë se nuk ulemi të negociojmë për presidentin. Këtu është siç thoshte një plakë rome që e doja shumë kur isha i vogël, të kesh dy, një ta mbash e një ta çash, se një nuk mjafton. Çështja e non gratës së madhe nuk është një çështje e Amerikës, është e Shqipërisë, nuk është një hall i DASH, është një hall i popullit shqiptar dhe sfida në fakt, në thelb, nuk është një sfidë që non grata e madhe me ata të verbrit që ndjekin pas ia bëjnë Amerikës.

Është një sfidë që ia bëjnë drejtësisë, sensit të së drejtës në këtë vend dhe sado të mundohemi ne, sado hetime denoncime, gjykime, dënime të jepen në këtë vend për këdo qoftë, nëse në këtë vend non grata e madhe, ai i dyti atje që është i pari në fakt me të cilin SPAK-u funksionon si sahat zviceran për të kap Ardian Dvoranin, gjykatësit dhe prokurorët që e bënë baltë e gjak të pafajshëm sistemin e drejtësisë në 30 vjet, ky nuk është problem i SHBA-ve miqtë e mi.

Është një problem i madh i Shqipërisë së të nesërmes. Sapo të ulem në tryezën e negociatave, kjo do të jetë kënga e re që do të fillojë.Është tallje e madhe që SPAK-u deri tani përdor vetëm një lloj grepi dhe vetëm për një lloj peshku dhe pa e pasur problem fare të gjuajë cironka me dinamit. Po nuk ka as parangall as vullnet që të gjuajë me dinamit peshkaqenët që i bëjnë leksione Amerikës dhe Europës dhe zgjohen e ngrysen duke nxjerrë llum nga goja,” tha Kryeministri Edi Rama duke kërcënuar në fund SPAK se durimi i tiij po soset:

“Durimi ynë po soset, i imi po e po, por edhe i juaji, SPAK dhe ata që janë të interesuar që të bëjnë drejtësi në këtë vend, duhet të kujtohen që ne nuk e kemi humbur gojën, e kemi vënë në vend dhe fakti që nuk kemi folur, por i kemi mbështetur për çdo veprim, dhe kur u bë veprimi i turpshëm i arkës së peshkut, shtrënguam dhëmbët, thirrja ime, që nuk është një thirrje partiake, por e asaj që ka udhëhequr reformën në drejtësi: Zonja dhe zotërinj të SPAK zgjohuni dhe dilini në mbrojtje Shqipërisë se Shqipëria është e turpëruar para një non grata që i bën karshillik një bote.

Këtë turp ta mbaj SPAK, në deklaratën e DASH e ka të qartë të bëjnë detyrën e tyre në atë përfundim dhe kjo nuk është për Amerikën, revolta ime dhe e jona nuk është se po na ofendohet Amerika apo se po fyhet Amerika, jo fare, është se po delegjitimohet SPAK dhe sistemi i drejtësisë që kanë ngatërruar detyrat e drejtësisë penale me përgjegjësi administrative, që kanë ngatërruar nevojën për drejtësi me shkeljen e lirive dhe të drejtave të njerëzve”, deklaroi Rama.