Jo vetëm me vaksina, Edi Rama bënë fushatë edhe me xhami

Në Gushtin e vitit 2020, Ministrja e Kulturës, Elva Margariti deklaroi se shumë shpejt, xhamia e Haxhi Et’hem Beut do t’i kthehet besimtarëve e vizitorëve. Dhe, shumë shpejtë, njeriu që nuk fle gjumë, Kryeministri Edi Rama, pas 8 muajve, inauguron xhaminë e restauruar të Et’hem Beut, në prag të zgjedhjeve parlamentare dhe në ditën e parë të muajit të bekuar të Ramazanit.

“Me zgjatjen e orarit do të keni mundësi të kryeni të gjitha ritualet. Kam shumë besim që ky muaj do të jetë energjizues, dhe që me daljen nga tuneli i pandemisë, me hapjen e sezonit turistik, të gjitha punëve për njerëzit, të dalë nga ajo që thoni ju se pas vuajtjes së madhe vjen lehtësimi. Do të kemi një perspektivë krejt tjetër. Ju uroj të gjithëve një muaj agjërimi të pranuar dhe Zoti qoftë me ju e me shqiptarët,” tha sot Edi Rama.

Duke publikuar përfundimin e restaurimit në rrjetin social Facebook, shoqëruar dhe me video Edi Rama thekson:

“Ky xhevahir i Trashëgimisë sonë Kulturore është kthyer në krejt shkëlqimin e vet, pas një pune të gjatë milimetrike, që ka nxjerrë gjithçka fshihej nën shtresat e kohërave dhe sot është vendi ideal, për të uruar Muajin e Madh të Ramazanit me besimin e madh se ky do të jetë edhe një muaj i afrimit vendimtar me dritën në fundin e tunelit rraskapitës të pandemisë”.

Pra, Edi Rama nuk bënë fushatë vetëm me vaksina kundër COVID-19, ai 12 ditë para zgjedhjeve inauguron edhe restaurimin e një xhamie për të cilën më 14 Gusht të vitit 2020 ministrja e Kulturës, Elva Margariti, e konsideronte punë të mbaruar”

“Shumë shpejt, një nga objektet më të rëndësishme të besimit mysliman, por dhe një monument i rrallë i trashëgimisë sonë kulturore, do t’i kthehet besimtarëve e vizitorëve. Falë mbështetjes financiare të TİKA Tiranë, ky objekt po kthehet në identitet. Ka mbaruar një nga fazat më të rëndësishme, ajo e restaurimit të afreskeve dhe po punohet për rregullimin e çatisë, të degraduar nga koha, për të vijuar me dyshemenë. Me gjithë vështirësitë e krijuara nga COVID-19, puna vazhdon,” tha ministrja e Kulturës, Elva Margariti, dy vjet pasi u firmos një marrëveshjeje bashkëpunimi mes ministrisë së Kulturës, dhe Komunitetit Mysliman të Shqipërisë, për restaurimin e pesë monumenteve kulturore të besimit islam, mes së cilave edhe xhamia e Et’hem Beut.

Ndryshe, Xhamia e Haxhi Et’hem Beut, është një xhami e ndërtuar në Shqipëri nga Mulla Beu, nga Petrela, rreth fundit të shekullit të tetëmbëdhjetë.