Joe Biden kritikon vendimin e Gjykatës së Lartë për imunitetin presidencial

Presidenti Joe Biden kritikoi vendimin e Gjykatës së Lartë mbi imunitetin presidencial, që u pa si një fitore për kundërshtarin e tij, ish Presidentin Donald Trump, duke e cilësuar një precedent të rrezikshëm në dëm të popullit amerikan.

Përmes deklaratave të qeta dhe të matura të dhëna nga Shtëpia e Bardhë zoti Biden tha se vendimi nënkupton se ka pak të ngjarë që zoti Trump të dalë në gjyq përpara zgjedhjeve të 5 nëntorit për rolin e tij në përpjekjet për të përmbysur rezultatin e zgjedhjeve të vitit 2020.

Në vendimin e së djeshëm, Gjykata e Lartë u shpreh se ish-presidentët kanë imunitet absolut nga hetimet për veprimet e tyre zyrtare, si dhe asnjë lloj imuniteti për veprimet jozyrtare, një vendim që njeh për herë të parë një lloj imuniteti presidencial nga hetimi.

“Ky komb u themelua mbi parimin se nuk ka mbretër në Amerikë. Askush nuk është mbi ligjin, as Presidenti i Shteteve të Bashkuara”, tha zoti Biden. Me vendimin e Gjykatës së Lartë, tha ai “kjo ka ndryshuar rrënjësisht”.

Ai shtoi se “unë do të respektoj kufijtë e pushtetit presidencial, siç kam bërë për tre vjet e gjysmë, por çdo president, përfshirë Donald Trumpin, tani do të jetë i lirë të injorojë ligjin”.

Presidenti Biden po kandidon për një mandat tjetër përballë kundërshtarit Donald Trump dhe ka qenë kritik ndaj veprimeve të rivalit të tij në lidhje me sulmin e 6 janarit 2021 ndaj Kapitolit nga mbështetësit e zotit Trump.

“Tani, njeriu që dërgoi njerëzit në Kapitol po përballet me mundësinë për t‘u dënuar penalisht për atë që ndodhi atë ditë. Populli amerikan meriton të ketë një përgjigje nga gjykatat përpara zgjedhjeve të ardhshme”, tha zoti Biden duke iu referuar zotit Trump.

Këto ishin deklaratat e tij të para në Shtëpinë e Bardhë pas debatit të parë presidencial me zotin Trump, ku paraqitja e tij, e cila u cilësua si e dobët, nxiti thirrjet që ai të tërhiqej nga gara.

Imuniteti i Trump, Gjykata e Lartë: Presidentët gëzojnë imunitet për aktet zyrtare, jo për ato jo-zyrtare!

Gjykata e Lartë zgjati më tej vonesat në gjyqin penal në Washington ndaj ish-presidentit Donald Trump, në lidhje me akuzat për përpjekjet për të përmbysur humbjen në zgjedhjet e vitit 2020, duke i dhënë pothuajse fund mundësisë që të zhvillohej një proces gjyqësor përpara zgjedhjeve të nëntorit.

Në një vendim historik dje, 6 me 3, anëtarët e Gjykatës së Lartë u shprehën për herë të parë se ish-presidentët kanë imunitet absolut nga hetimet për veprimet e tyre zyrtare, si dhe asnjë lloj imuniteti për veprimet jozyrtare. Por, anëtarët e Gjykatës së Lartë ia lanë gjykatës së nivelit më të ulët mënyrën se si do ta zbatonin këtë vendim në rastin e ish-presidentit Trump.

Vendimi i djeshëm nënkupton vonesa të mëtejshme përpara se ish-presidenti Trump të përballet me një proces gjyqësor për padinë e ngritur nga prokurori i posaçëm Jack Smith.

Vendimi i Gjykatës së Lartë është i dyti që ka të bëjë me Ish-Presidentin Trump. Më herët, Gjykata e Lartë vendosi në lidhje me përpjekjet për ta hequr ish-presidentin nga kandidimi në shtete të caktuara për shkak të veprimeve të tij pas zgjedhjeve të vitit 2020. Të dyja këto vendime nxjerrin në pah ndikimin e drejtpërdrejtë që Gjykata e Lartë ka në zgjedhjet presidenciale të nëntorit.

Ky është vendimi i fundit i Gjykatës së Lartë për këtë sesion pune dhe u mor gati dy muaj pasi gjykata dëgjoi argumentet e palëve, një ritëm më i ngadaltë nga ç’është vepruar në të kaluarën për çështje madhore që kanë patur të bëjnë me presidencën, si p.sh. çështjen e skandalit të Uotergeitit.

Ish-presidenti Trump shkruajti me gërma të mëdha shtypi në rrjetin e tij të mediave sociale, pasi pasi ishte njoftuar vendimi: “FITORE E MADHE PËR KUSHTETUTËN DHE DEMOKRACINË TONË. KRENAR QË JAM AMERIKAN!”

Ish-Presidenti Trump ka mohuar të ketë bërë ndonjë shkelje dhe ka thënë se ky proces hetimor, ashtu si edhe tre procese të tjera hetimore ndaj tij, janë të motivuara politikisht dhe se janë përpjekje për të ndalur rikthimin e tij në Shtëpinë e Bardhë.

Në muajin maj, Donald Trump u bë ish-presidenti i parë amerikan i shpallur fajtor për vepra penale, në një gjykatë në New York. Ai u gjend fajtor për falsfikim të të dhënave të biznesit, në lidhje me pagesat e bëra përpara zgjedhjeve presidenciale të vitit 2016, për të fituar heshtjen e një aktoreje të filmave pornografikë që thotë se ka patur marrëdhënie seksuale me të. Ish-presidenti i mohon akuzat në lidhje me këtë rast dhe tashmë përballet edhe me tre procese të tjera gjyqësore.

Prokurori i posaçëm Smith drejton dy hetime federale ndaj ish-presidentit, nga të cilat janë ngritur tashmë akuza penale. Padia në Washington përqëndrohet tek akuzat për përpjekjet e ish-presidentit Trump për përmbysjen e humbjes në zgjedhjet e vitit 2020 përballë demokratit Joe Biden. Padia në Florida ka të bëjë me menaxhimin e dokumenteve të klasifikuara. Çështja tjetër në Xhorxhia përqëndrohet gjithashtu tek veprimet e ish-presidentit Trump pas humbjes në zgjedhjet e vitit 2020.

Gjyqi në Uashington ishte planifikuar fillimisht për të filluar në 4 mars, por kjo ishte përpara se të bëheshin përpjekjet për shtyrje dhe për një shqyrtim të plotë nga Gjykata e Lartë. Përpara se të përfshihej në këtë proces Gjykata e Lartë, një gjykatëse e nivelit më të ulët në dhjetor, si dhe një trupë gjyqësore prej tre gjykatësish në shkurt, patën vendosur unanimisht se zoti Trump mund të procedohej për veprimet e ndërmarra gjatë mandatit si president përpara ngjarjeve të 6 janarit./VOA/