Jozefina në Pallatin e Faraonit!
nga Agim Popoci
Mbrëmja e 18 Qershorit në Shkodër do të mbahet në mend me gjenerata të tëra, se si Policia e Shtetit kundërshtoi Dekretin e Presidentit të publikuar në Fletoren Zyrtare dhe dhunoi pushtetin vendor të këtij qyteti, dhe jo vetëm!
Tensionet që shkaktoi policia dhe përshkallëzimi i situatës zuri në befasi të gjithë!
Shkodra si asnjë qytet tjetër, vazhdon ti kenë të freskëta kujtimet nga regjimi i diktatorit parardhës të Edi Ramës, ashtu si dhe Protestat e 2 Prillit që atij regjimi kriminal i thanë: Jo!
Këtë nuk e përfilli vetëm Edi Rama dhe klika e tij. Për tri ditë provokuan dhe dhunuan shkodranët vetëm pse paligjshmëria e Kryeministrit duhet të zbatohej qoftë dhe me forcën e Policisë së Shtetit.
Pse Policia e Shtetit përzgjodhi këtë strategji këtë e di Edi Rama, por reagimi qytetarë dhe vënia e zjarrit materialit zgjedhor të paligjshëm, janë dy momente që nuk është se kishin ndonjë skenar. Erdhën si reagim i çastit ndaj sjelljes kriminale të Policisë së Shtetit dhe që u interpretua në mënyra të ndryshme.
Ndër kritikët e ashpër të këtij reagimi, përveç Edi Ramës, Taulant Ballës dhe Sandër Lleshajt, u veçua Ish-Nënkryetarja e Partisë Demokratike, Jozefina Topalli.
Ithtarët e Partisë Demokratike duke njohur qëndrimin e Jozefina Topallit ndër vite menduan se kritika kishte të bënte me reagimin e beftë të opozitës, dhe ç’është ky opozitarizëm me djegien e fletëve të votimit!
Por, çuditërisht, rezultoi se Jozefina Topalli kritikonte Partinë Demokratike pse i kishte vu flakën fletëve të votimit në KZAZ ose siç e interpretoi ajo “djegien e shkollës”.
Sot Jozefina Topalli thotë se një demokrat nuk djeg as mandate as shkolla! Përkundër kritikave që e përmbytën figurën e Ish-Nënkryetares së PD, nëse I bëhet një analizë e hollë veprimit të saj politik, rezulton se vërtetë ajo kurrë nuk ka mbështetur një opozitarizëm të këtij lloji madje as molotovin, siç e thekson në reagim.
Ama demokratët duhet të kujtojnë fjalët e Jozefina Topallit, jo për ti sjellë në vepra, por në kohën e saj, pra, gjatë këtij 30 vjeçari për të cilin flet ajo, ka kërkuar plumb në ballë për Gramoz Ruçin! Falë zotit nuk e dëgjoi njeri meqë nuk ishte e para e partisë sepse kjo nismë opozitare nuk dihet se ku do të përfundonte.
Në atë kohë, kishte dhe ndër demokratë mbështetës të kësaj ideje duke menduar se iniciativa po vinte nga një grua e hekurt e së djathtës që kishte vuajtur gjatë komunizmit, dhe ndjesia thjeshtë ishte natyrale.
Por administrata që ajo përzgjodhi si Kryetare e Parlamentit, me spiunë dhe sigurimsa, dhe rehatia e madhe që gjeti me humbjen e Partisë Demokratike, dëshmojnë se zonja e hekurt është zonjë e regjimeve dhe jo zonjë e hekurt e së djathtës! Këtë e përforcon edhe më shumë fakti se shpërfytyrimi i zonjës së hekurt erdhi kur ajo më nuk ishte demokrate me pushtet. Në momentin që nuk e pa emrin e vet në listë, ajo më nuk ishte për plumb në ballë, por për një qokë të Edi Ramës, qoftë ajo edhe në Podgoricë.
Dhe jo vetëm kaq. Jozefina Topalli thotë se ai që mendon të pengojë të drejtën e votës nuk është demokrat! Konkluzion i çuditshëm i një Ish-Nënkryetare të PD, kur ai që e punëson, Edi Rama, në OSBE dhe lejon të pengohet e drejta e votës nga socialistët, na del se është demokrat 28 karatësh!
Dhe në fund, Jozefina Topalli thotë se 3 milionë shqiptarë nuk mund të mbeten gjatë peng të 4-5 vetëve. Edhe këtu është pasaktë madje shumë e pasaktë! Meqë Jozefinës nuk ia qetë goja sepse është mpleksur me të dytë, ajo që po ndodhë në Shqipëri dëshmon se Shqipëria ishte dhe ka mbetur peng për këto 3 dekada, vetëm e dy vetëve. Meqë Fatos Nano hapi krahun për hir të partisë, Ilir Meta dhe Edi Rama mund të vazhdojnë me zallamahinë e këtij vendi i cili është në prag të luftës civile, por kjo pak rëndësi ka për Jozefina Topallin e cila fle duke menduar se demokratët janë po ata, kur ajo u fliste dhe kishte në krah Sali Berishën; Apo mendon se këtë ia lejon edhe emri që mbanë mbi supe.
Legjenda, sipas Biblës, thotë se Jozefi është ai të cilin vëllezërit e shitën si skllav, dhe ai me ndershmëri dhe mençuri u ngrit deri në dinjitetin më të madh në Pallatin e Faraonit.
Meqë vëllezërit demokrat nuk e shitën Jozefina Topallin tek Edi Rama por ajo vetë zgjodhi që të shitet, ndoshta kjo shpjegon pse Jozefina i jep të drejtën vetes të përzgjedh mënyrën se si do të futet në Pallatin e Faraonit!
