Ju flet “Radio Guvernatori Sejko”: Nënçmimi euros po vjen nga përmirësimi i ekonomisë!
Eksportuesit janë në hall të mall meqë produktet e tyre po shiten me kursin më të ulët të euros në histori, bujqësia po shkon drejtë një falimentimi ekstrem me vlerën e euros që vazhdon rënien, ndërtuesit vazhdojnë të blejnë materialet me çmimet shumë të larta ndërkohë nga shitjet në euro që e kanë praktikë nuk arsyetojnë as koston e ndërtimit, pronarët e hoteleve nuk e gjejnë dot zgjidhjen me rezervimet që u janë bërë nga jashtë shtetit në euro dhe nuk po përballojnë koston me furnizimet që bëjnë, dhe, sot, të gjithë këta të prekur nga ky kurs i euros në rënie natyrisht se nuk dëgjojnë “Ju flet Radio Moska”, por, kishin rastin të dëgjojnë transmetuesin radiofonik të Kryeministrit Edi Rama, Guvernatorin e Bankës së Shqipërisë, Gent Sejko!
Ndonëse me përvojë pune në banka të nivelit të dytë, Guvernatori Sejko, shpërfill gjithë këtë realitet dhe pas përfundimit të mbledhjes së Këshillit Mbikëqyrës deklaron se kursi i këmbimit po vjen si rrjedhojë e përmirësimit të aktivitetit ekonomik dhe Banka nuk mund të ndërhyjë.
“Hyrja e euros në vend po stimulohet nga flukset e turizmit dhe investimet e huaja. Blerjet e pasurive të paluajtshme nga të huajt dhe remitancat. Për rrjedhojë Banka nuk arsye të ndërhyrje në kursin e këmbimit,” tha Gent Sejko pa sqaruar se ndonëse euro vazhdon e bie pse çmimet e karburantit ashtu si dhe drithërave nuk po ulen por rriten, e kur është fjala te turizmi ku ndikimin më të madh nuk e ka Qet Kastrati por shqiptarët e Kosovës edhe pse cilësohen “të huaj” dhe vazhdojnë të paguajnë te trau 660 lekë ose aktualisht 6.6 euro për një kalim, ndonëse marrëveshja koncesionare thotë “5 euro”.
Dhe, kur eksportuesit vazhdojnë me pikiaton e tyre të pashpresë, “Ju flet Guvernatori Sejko” u thotë se sot është mbledhur Këshilli Mbikëqyrës por javën që vjen do të diskutohen efektet e kursit të këmbimit me bankat tregtare dhe shoqatat e eksportit, për të ndihmuar bankat dhe bizneset nga kreditë e këqija për të shikuar mundësi të ristrukturimi.
“Ne jemi në një situatë inflacioniste. Pandemia dhe lufta në Ukrainë e përshpejtoi rritjen e çmimeve. Kjo po ndodh në gjithë botën,” tha “Ju flet Radion Guvernatori Sejko”.
Ndryshe, sipas kursit zyrtar të Bankës së Shqipërisë, 1 euro u këmbye sot me 104.55 lekë, me një rënie prej 0.3 lekësh në raport me ditën e mëparshme, duke arritur në një tjetër rekord minimal historik, që nga viti 2002, kur euro filloi të funksiononte si monedhë fizike.
Që nga fillimi i këtij viti euro ka rënë me 11.5 lekë ose rreth 10%, aktorët e mëdhenj të tregut thonë se kjo tendencë është e lidhur me ofertën e lartë në treg, që vjen si nga turizmi ashtu dhe nga burimet informale, që kanalizohen kryesisht në pasuritë e paluajtshme, dhe nga ana tjetër asnjë nuk tërheq më euro, duke bërë që monedha e përbashkët të bjerë në mënyrë të vazhdueshme.
Në këtë situatë “Ju fletë Radio Guvernatori Sejko” thotë se Banka e Shqipërisë ndërhyn në rast të blerjes së valutës për krijimin e rezervës dhe për këtë ndërhyrje ka një kalendar të përcaktuar paraprakisht, dhe në 6 mujorin e parë ka blerë 120 milionë euro, dhe do të vazhdojë me blerjet.
