Ju ka skaduar karta e identitetit? Apeli i Ministrisë së Brendshme…

Qytetarët të cilëve u përfundon afati i vlefshmërisë së kartave të identitetit ID, t’u drejtohen zyrave të aplikimit sa më shpejt për të shmangur radhët e fundvitit. Ky është apeli i Zv/Mministres së Brendshme, Rovena Voda, i cili u bë gjatë inspektimit të zyrave të aplikimit për kartat e identitetit në Njësinë Administrative Nr. 8 dhe 9 në Tiranë.

“Kemi vënë re një ulje të fluksit të aplikimeve për karta të identiteti kohët e fundit, kjo ndoshta edhe për shkak të vendimit për shtyrjen e afatit të vlefshmërisë, por ne u bëjmë thirrje qytetarëve të vijnë të aplikojnë, të mos e lënë për momentin e fundit, pra në dhjetor, pasi do të ketë një fluks tjetër, i cili është, ai i lëshimit të pasaportave biometrike, çka do të vështirësojë në një farë mënyrë edhe pajisjen me karta identiteti,” apeloi Zv.ministrja e Brendshme.

Ndryshe, Zv/ministrja e Brendshme, Rovena Voda, së bashku me Drejtorin e Përgjithshëm të Gjendjes Civile Bledar Doracaj, inspektuan zyrat e aplikimit për kartat e identitetit në Njësinë Administrative Nr. 8 e 9 në kryeqytet.