Juri Gagarini n’Hapësirë, Lulzim Basha n’Washington!

nga Agim Popoci

Një entuziazëm i madh gjatë këtyre ditëve ka kapluar një grup shqiptarësh që veten e konsiderojnë demokratë, pasi lideri i tyre udhëtoi për në Washington! Entuziazmi ishte aq i madh, sa i këtyre përmasave nuk ishte parë që nga viti 1961 kur Juri Gagarin udhëtoi në hapësirë dhe përshkoi orbitën e tokës!

Ndryshe nga udhëtimi i 61 viteve më parë ku pavarësisht kritikave, fluturimi prej 108 minutave i anijes kozmike “Vostok 3KA-3”  me Juri Gagarin u vlerësua se ishte një sukses i madh dhe u  pranua më vonë edhe nga shkencëtarët perëndimor të cilët u pajtuan edhe me ndërtimin e stacioneve të përbashkëta hapësinore, me udhëtimin e Lulzim Bashës nuk u mor njeri, e për sukses as që bëhet fjalë!  

Jo vetëm pse lideri i këtij grushti shqiptarësh të cilët ndjenë entuziazmin aq të madh sa ai sovjetik nuk bëri një fluturim historik, as me raketë, as në hapësirë e aq më pak për të përshkuar orbitën e tokës, por, thjeshtë, ai shkoi në një udhëtim i cili u realizua pasi i dhanë vizën e merituar, i thanë hip në avion, dhe, ik në Washington!

Pse?! Edhe këtë radhë as vetë nuk e dinë, dhe për të pak rëndësi ka, ashtu siç nuk kishte rëndësi kur e çonte dikur Doktori, dhe, sot e çon Infermierja! Madje, as ai vetë nuk e bëri publike meqë nuk kishte kuptim për të bërë të ditur një udhëtim drejt Washingtonit për arsye shumë më pa lidhje se sa ato që i bënë Edi Rama; Dhe, këtë mision të pamundur ia besoi Fanes, atij burimi të pashtershëm për të dëmtuar Partinë Demokratike, sa vetëm Ilir Meta kishte aftësi t’a shpikë. Dhe, njeriu me tre gazeta, dy portale dhe një televizion, gjeti një vrimë sa për të thënë se “Lulzim Basha ishte në Washington!”

E ndjekësit e tij besnik që veten e konsiderojnë demokratë vetëm pse urrejnë Sali Berishën, siç nuk e kuptuan rëndësinë e udhëtimeve të Doktorit që dikur e përjetonin si lider, ashtu nuk i kuptojnë as sot udhëtimet e Lulit, se, kur janë ato të rëndësishme; Dhe, kur një udhëtim raportohet vetëm nga media e Fanes se “Lulzim Basha ka marrë pjesë në një aktivitet të organizuar në Qendrën Amerikane për Studime Strategjike në Washington DC”!

Madje, këtë nuk e deskriptoi as Kunati për të lëshuar urdhërin e radhës për mediat dhe asqerët në mediat sociale dhe portalet që financon! Ndryshe, do të kontrollonin emocionet e veta dhe nuk do të përfshiheshin nga entuziazmi sovjetik.

Dhe jo vetëm kaq!

Mund të jetë e vërtetë se Juri Gagarini ka kënduar këngë patriotike ndërsa po përshkonte orbitën e tokës, siç ka rrëfyer ai vetë pas fluturimit, dhe, Lulzim Basha lehtësisht mund të ketë kënduar himnin kombëtar që e ka shumë për zemër, gjatë udhëtimit drejt Washingtonit; Por, ky nuk është detaj që irriton një perëndimor edhe pse mund të ketë emocionuar ndonjë sovjetik! 61 vjet para këtij fluturimi në Washington, dhe vetëm një muaj pas fluturimit të Gagarinit në hapësirë, edhe pse kishte amerikanë që ishin të zhgënjyer me NASA-n pse nuk e realizoi këtë fluturim e para, astronauti amerikan Alan Shephard, Jr. bëri fluturimin e tij të parë në garën për hapësirë dhe udhëtoi me një shpejtësi shumë të madhe, dhe sot konsiderohet një ndër fluturimet shumë të rëndësishme hapësinore!

Ndërkohë Juri Gagarinit nuk iu lejua më kurrë të fluturoi në hapësirë!

Kjo është dhe arsyeja pse Lulzim Basha dhe ndjekësit e tij duhet të kontrollojnë emocionet. Ndoshta pa kaluar dhe muaji, 61 vjet pas fluturimit të Gagarinit dhe me zbardhjen e vendimit të Gjykatës së Apelit në Tiranë, Basha edhe zyrtarisht mund të marrë çertifikatën e ngjashme të fatit, si Juri Gagarini, dhe nuk do të mund të fluturoj më si kryetar i PD!

Në fund, për të mos i ngelur hatri këtij grushti shqiptarësh që vazhdojnë ti qëndrojnë besnik Lulzim Bashës për inat të Ish-Sekretarit të partisë së Fakultetit të Mjekësisë, Prof.Dr. Sali Berisha, dhe po përballen me vlerësimin se vërtetë udhëtim i liderit të tyre ishte kot fare dhe nuk ka asnjë fije ngjashmërie me atë të Juri Gagarinit, duhet të jemi edhe të sinqertë!

Udhëtimi i Gagarinit në hapësirë dhe ai i Bashës në Washington mund të kenë një ngjashmëri, por, jo pak të rëndësishme: Që të dyja mund të jenë paguar me rubla ruse!