Ka ankesa në PZAP, KQZ e Kosovës nuk do të procedojë me rezultatet përfundimtare

Komisioni Qendror i Zgjedhjeve, KQZ, do të procedojë me shpalljen e rezultateve përfundimtare të zgjedhjeve të 9 shkurtit në Kosovë vetëm pasi të ketë vendimmarrje të PZAP-së dhe eventualisht Gjykatës Supreme ndaj ankesave që janë paraqitur nga Lëvizja Vetëvendosje.

Kështu ka bërë të ditur sot zëdhënësi i KQZ-së, Valmir Elezi.

“KQZ është njoftuar nga Paneli Zgjedhor për Ankesa dhe Parashtresa se në këtë institucion janë paraqitur tri ankesa nga një subjekt politik. Andaj, KQZ do të presë vendimmarrjen e PZAP-it dhe eventualisht edhe të Gjykatës Supreme para se të procedojë me shpalljen e rezultateve përfundimtare të Zgjedhjeve për Kuvendin e Kosovës, të cilat janë mbajtur më 9 shkurt 2025,” tha Valmir Elezi.

Ndërkohë, nga Lëvizja Vetëvendosje konfirmojnë se ankesat lidhen me votimin me postë.

“Është evidente skema që është përdorur nga votimi përmes postës në mërgatë. 400% më shumë vota për LDK-në, me vota shabllone për kandidatë të caktuar, ndërkohë që ekstremisht larg nga ky trend janë PDK e parti të tjera opozitare,” ka sqaruar zëdhënësi i Lëvizjes Vetëvendosje, Arlind Manxhuka, përmes rrjetit social Facebook.

Lëvizja Vetëvendosje, tha ai, kërkon hetim të plotë për të gjitha parregullsitë e raportuara në mënyrë që të sigurohet një proces zgjedhor i pastër, i drejtë dhe i ndershëm.

“Sikurse, shkeljet dhe parregullsitë e evidentuara tashmë i kemi raportuar në polici dhe prokurori. Mbetemi në pritje të reagimeve konkrete dhe zyrtare nga institucionet përgjegjëse. Vullneti i popullit i shprehur në zgjedhjet e 9 shkurtit 2025 nuk mund të preket e as tjetërsohet.”

Procesi i numërimit të votave në QNR ka përfunduar të mërkurën, derisa subjektet politike kanë pasur afat 48 orë për të paraqitur ankesat.

Ndërkohë, lidhur me ankesat në procesin e numërimit të rezultateve, Prokuroria Themelore në Prishtinë ka konfirmuar se është në fazën e grumbullimit dhe verifikimit të informacionit.