Ka ardhur koha, Basha në Fushë Arrëz: Të ofrojmë rrugëdalje nga kjo krizë!

Ka ardhur koha ti ofrojmë shqiptarëve rrugëdaljet nga kjo krizë e tmerrshme tha Kryetari i Partisë Demokratike, Lulzim Basha, në Fushë Arrëz duke u shprehur i bindur se PD me Aleatët është fituese e zgjedhjeve të lira e të ndershme kurdo që të mbahen ato.

Këtë, tha Lulzim Basha, e vërtetoi 30 Qershori duke i bashkuar shqiptarët krah opozitës kundër bandës së Rilindjes në pushtet.

“Përmes 6 muajsh protestash i kemi dhënë kurajo çdo shqiptari, kemi vetëdijësuar çdo shqiptar dhe sot pas 30 qershorit, nuk janë vetëm sondazhet ato që tregojnë PD dhe aleatët fitues të zgjedhjeve të ardhshme, të lira e të ndershme kurdo që të mbahen ato, por është vetë përmasa e 30 qershorit. Janë 85 përqind e shqiptarëve të cilët ushtruan me refuzimin e tyre në 30 qershor, thirrjen kombëtare: “Rama ik” dhe vulosën kësisoj aleancën më të madhe politike që ka njohur Shqipëria dhe shqiptarët që nga vitit 1992.”

Dhe jo vetëm kaq! Duke u bazuar në 85 përqindshin e shqiptarëve që e refuzuan Edi Ramën, lideri i opozitës tha se tashmë bandën e Rilindjes e kanë braktisur dhe socialistët.

“Me 30 Qershor Edi Ramën dhe regjimin e tij e kanë braktisur edhe socialistët. 30 Qershori është dita e bashkimit më të madh ‘Rama ik’, por është edhe një klithmë, një kushtrim për ndryshim,” tha Kryetari i Partisë Demokratike para strukturave të PD në Fushë Arrëz.

Demokratët, tha Kryetari i Partisë Demokratike, Lulzim Basha, duhet ti përgjigjen thirrjes së shqiptarëve që duan ndryshimin e madh:

“Prej nesh shqiptarët kërkojnë më shumë se denoncime, më shumë se përballje, kërkojnë më shumë siguri për të nesërmen dhe rrugën e ndryshimit të vërtetë ku gjithkush do të jetë më mirë,” ndërsa përfundoi:

“Tani ka ardhur koha ti ofrojmë shqiptarëve rrugëdaljet nga kjo krizë e tmerrshme dhe ta shndërrojmë shumicën 85 përqind “Rama ik”, në shumicën e re qeverisëse që do ti prijë transformimit ekonomik dhe politik të vendit.”