Ka vetëm një rrugë që shqiptarët të votojnë të lirë, Berisha: Protesta, protesta dhe vetëm protesta!
Kryetari i Partisë Demokratike, Sali Berisha, duke denoncuar në seancën e sotme plenare krimin elektoral të 14 Majit, tha se ka vetëm një rrugë që shqiptarët të votojnë të lirë dhe ka vetëm një rrugë që Edi Rama të mos blejë nën dorë me qindra milionë euro vota: Protesta, protesta dhe vetëm protesta!
“Jam këtu për të denoncuar farsën e turpshme kriminale elektorale të 14 majit.
Në këtë farsë, krahas dërgimit të 683 mijë zarfeve në kundërshtim flagrant me ligjet e vendit dhe Kartën e Kopenhagenit për zgjedhjet e lira dhe të ndershme, për herë të parë në historinë e këtij vendi krahas të caktimit të kryetarit të koalicionit opozitar nga qeveria, një akt i shëmtuar që tregon fytyrën e vërtetë të këtij regjimi, komisioneve 6 me 1 apo 6 me 0 si kurrënë historinë e këtij vendi, krahas qindra milionë eurove të shpërndara nën dorë nga Edi Rama dhe asistenti i tij Tom Doshi, të cilët deformuan në mënyrë ekstreme një rezultat, ku për 40 përqind të votave, arrihet vetëm 5 përqind pushtet, u përdor një mekanizëm tjetër kriminal monstruoz për të deformuar rezultatin e zgjedhjeve,” tha Sali Berisha nga foltorja e Parlamentit duke theksuar se u përdorën zgjedhësit fantazmë apo zgjedhësit që votuan mbi 1 herë, dy apo tre herë në qytete të ndryshme.
“Zgjedhësit fantazmë që votuan më shumë se një herë ishin në total 547 mijë të tillë.
Në Bashkinë e Vlorës ata arrinin në 29 përqind, në Bashkinë e Vorës 15 përqind, në Përrenjas 28 përqind, në Kurbin 30 përqind, në Konispol 34 përqind, në Has 18 përqind, në Kamëz 21 përqind, në Durrës 23 përqind, në Shkodër 16 përqind, në Devoll 20 përqind, në Delvinë 34 përqind, në Mallakastër 11 përqind dhe kështu me radhë.
Është kjo ushtri e zgjedhësve fantazmë që u përdor masivisht për të mashtruar rezultatin e zgjedhjeve me 14 maj, krahas faktorëve të tjerë.”
Në fund duke denoncuar në parlament këtë batërdi elektorale, për këtë farsë, Kryetari i Partisë Demokratike tha se ka vetëm një rrugë që shqiptarët të votojnë të lirë.
“Ka vetëm një rrugë që Edi Rama të mos blejë me paratë tuaja publikisht votën, ka vetëm një rrugë që Edi Rama të mos blejë nën dorë me qindra milionë euro vota, ka vetëm një rrugë që Edi Rama të mos përdorë zgjedhësit fantazmë dhe kjo rrugë është protesta, protesta dhe vetëm protesta.
Kombi polak, për një ligj që vë në diskutim procesin zgjedhor, është i tëri në rrugë,” tha Kryetari i Partisë Demokratike, Sali Berisha, duke përfunduar:
“Unë qëndroj këtu me thirrjen time të fuqishme, në protestë dhe vetëm në protestë. Përndryshe, ata që përpiqen të justifikojnë këtë vjedhje monstruoze të votës, bëhen mbështetës të një krimi të paparë në historinë elektorale.
Unë kam bindjen se qindra mijëra idealistë që votuan për opozitën do ngrihen dhe do krijojnë mundësinë që të votojnë të lirë.”
