Ka vetëm një zgjidhje!

nga Romeo Gurakuqi

Ka vetëm një zgjidhje të krizës politike që po kalon vendi ynë: Dorëheqja e Kryeministrit dhe e qeverisë së tij eksperimentale, zhvleftësimi i të gjitha veprimeve të paligjshme procedurale të kryera nga mazhoranca në kundërshtim me Kushtetutën, Kodin zgjedhor dhe me parimin e sovranitetit politik, pas datës 25 shkurt 2019, thirrja e tryezës së zgjeruar të partive, nën garancinë e disa intelektualëve të spikatur, tryezë që do të përcaktojë parimet e formimit të qeverisë tranzitore, rrugët e rikthimit të legjitimitetit dhe funksionalitetit të Parlamentit, do të përcaktojë karakteristikat e kryeministrit të ri dhe kohëzgjatjen e qeverisë së re të tij, e cila do të balancojë territorialisht, politikisht dhe institucionalisht shtetin që përçudnuan rilindasit.

Ndryshe, kriza do të thellohet, krijimi i dy pushteteve politike paralele do jetë i pashmangshëm, dezintegrimi i pushtetit vendor do të jetë një vendim i pakthyeshëm, zhvillimi në kohe i zgjedhjeve lokale praktikisht i pamundshëm dhe hapja e negociatave një ëndërr e dimrave të ardhshëm. 

Edi Rama me dashnorët e vdekjes, që e shoqërojnë atë me armë kimike në dorë, në marrëzinë e qëndresës kundër popullit opozitar, mendjefyçkat socialiste, që i rrinë përbri pushtetit te tij, mund të mos e kuptojnë udhën në të cilën e kanë futur vendin. Problemi është se ata janë përgjegjësit kryesore të situatës së krijuar dhe koha e tyre nuk mund të zgjasë më!

Tanimë është e qartë, se së bashku me Edi Ramën, do të ikin të gjitha ata që heshtën, vallëzuan dhe u fshehën, kur detyra i thërriste të ishin me publikun, në mbrojtje të institucioneve kushtetuese, në eliminimin e vuajtjeve dhe tensioneve, që prodhoi mazhoranca e zgjedhjeve të vjedhura.