Kadri Veseli: Bizneset nuk do ta paguajnë më TVSH-në në kufi

Kandidati për Kryeministër i PDK-së, Kadri Veseli, në takim me sipërmarrësit në Ferizaj premtoi zhvendosjen e pagesës së TVSH-së nga kufiri në pagesën e TVSH-së vetëm kur malli të jetë në duar të konsumatorëve.

“PDK nuk do t’i ngarkojë bizneset me asnjë tatim të ri dhe nuk do t’i rrisë as tatimet ekzistuese. Do të ndodhë e kundërta, ne do të ofrojmë lirime, incentiva dhe do ta eliminojmë burokracinë. Ne do ta bëjmë zhvendosjen e pagesës së TVSH-së nga kufiri në brendësi të vendit, në mënyrë që bizneset ta paguajnë TVSH-në vetëm kur malli të jetë në duar të konsumatorëve,” tha Kadri Veseli duke pasur parasysh se malli i importuar mund të qëndrojë pa u shitur edhe me vite:

“Kështu që duke mos paguar më TVSH-në në kufi, bizneset mund të kursejnë dhe të investojnë më shumë në zgjerimin e veprimtarive të tyre. Asnjë biznes më nuk do të ketë nevojë të marrë kredi për të paguar TVSH-në, duke minimizuar kështu edhe koston e interesave,” tha Kandidati për Kryeministër i PDK-së, Kadri Veseli, duke ju përgjigjur kërkesës së kahmotshme të biznesit kosovar.