Kadri Veseli: Kosovës i duhet konsensusi kombëtar për ballafaqim me Serbinë
Kryetari i Partisë Demokratike të Kosovës, Kadri Veseli, tha integriteti i territorit të Kosovës është i pacenueshëm dhe i shenjtë ndërkohë thirrjen e seancës së Kuvendit të Kosovës për të diskutuar për territor e vlerësoi të dëmshme.
“Integriteti i territorit të Kosovës është i pacenueshëm dhe i shenjtë. Shtetet na kanë njohur me këtë territor që tani e kemi. Asociacioni nuk do të ekzistojë me kompetenca ekzekutive”, tha Veseli duke shtuar Kosovës i duhet konsensusi kombëtar për ballafaqim me Serbinë. Jo ndarja për ndarje mes vete dhe përfitime elektorale.
“Seancë e jashtëzakonshme për ndarje e thirrur nga opozita është dëmi më i madh që i shkaktohet Kosovës, si shtet i pavarur dhe sovran dhe partneritetit me bashkësinë ndërkombëtare,” tha kryetari i PDK-së ndërsa vlerësoi se legjitimimi i temës së ndarjes në institucionin e Kuvendit pa fakte, pa argumente dhe me Kushtetutë të qartë është vetëm inskenim i lojës së papranueshme për ndarje, që është skenar jashtë Kosovës, SHBA-së dhe BE-së.
“Partia Demokratike e Kosovës konsideron se ngritja e kësaj teme të rrezikshme në diskursin e brendshëm politik do ta dëmtojë Kosovën në procesin e dialogut, duke krijuar argumente pikërisht në favor të eksponentëve anti–Kosovë që dëshirojnë ndarjen e Kosovës,” tha Veseli duke shtuar se Partia Demokratike e Kosovës, si gjithherë deri më tash, është e pakompromis dhe e vendosur që ta luajë rolin e vet aktiv dhe konstruktiv për ta arritur këtë qëllim.
“I sigurojmë qytetarët e Kosovës se si Parti Demokratike e Kosovës, do të jemi në krye të mbrojtjes së interesave kombëtare dhe shtetërore, për të fuqizuar edhe më tej shtetin tonë të pavarur dhe sovran, kundër asociacionit, etj.” tha Kadri Veseli duk ekonfirmuar se PDK do të jetë në seancën e jashtëzakonshme të së hënës në Kuvendin e Kosovës.
Ja deklarata e plotë:
Gjatë muajve të fundit, Partia Demokratike e Kosovës ka bërë thirrje dhe ka ndërmarrë iniciativa konkrete për të përafruar qëndrimet politike dhe ndër-partiake, si dhe për të arritur konsensusin nacional.
Qëndrimi i Partisë Demokratike të Kosovës, është konsistent dhe i qartë: Në asnjë mënyrë nuk do të lejohet cenimi i sovranitetit të Kosovës, i integritetit territorial të shtetit tonë dhe i Kushtetutës së Republikës së Kosovës. Asociacioni me kompetenca ekzekutive është i papranueshëm.
Kosovës i duhet konsensusi nacional për ballafaqim me Serbinë. Jo ndarja për ndarje mes vete dhe përfitime elektorale.
Seancë e jashtëzakonshme për ndarje e thirrur nga opozita është dëmi më i madh që i shkaktohet Kosovës, si shtet i pavarur dhe sovran dhe partneritetit me bashkësinë ndërkombëtare.
Legjitimimi i temës së ndarjes në institucionin e Kuvendit pa fakte, pa argumente dhe me Kushtetutë të qartë është vetëm inskenim i lojës së papranueshme për ndarje, që është skenar jashtë Kosovës, SHBA-së dhe BE-së.
Partia Demokratike e Kosovës konsideron se ngritja e kësaj teme të rrezikshme në diskursin e brendshëm politik do ta dëmtojë Kosovën në procesin e dialogut, duke krijuar argumente pikërisht në favor të eksponentëve anti–Kosovë që dëshirojnë ndarjen e Kosovës.
Partia Demokratike e Kosovës, si gjithherë deri më tash, është e pakompromis dhe e vendosur që ta luajë rolin e vet aktiv dhe konstruktiv për ta arritur këtë qëllim.
I sigurojmë qytetarët e Kosovës se si Parti Demokratike e Kosovës, do të jemi në krye të mbrojtjes së interesave kombëtare dhe shtetërore, për të fuqizuar edhe më tej shtetin tonë të pavarur dhe sovran, kundër asociacionit, etj.”
