Kakavijë, 38 vjeçari kapet me 41 mijë euro

Një 38 vjeçar nga Kuçova është ndaluar nga policia kufitare në Kakavijë, pasi iu gjet një shumë e padeklaruar prej 41 mijë euro. Sipas policisë  personi do të kalonte në territorin grek kur mjeti i tij u përzgjodh për kontroll.

“Shtetasit me iniciale E.B., gjatë kontrollit në pjesën e brendshme të automjetit u gjend e fshehur një sasi e konsiderueshme valute euro, të cilën ky shtetas po e kalonte drejt Greqisë, pa e deklaruar tek shërbimet doganore. Nga numërimi i sasisë rezultoi se ishin në total 41.000 euro,” thuhet në njoftimin e policisë.

Policia Kufitare e Kakavijës ka njoftuar specialistët për hetimin e krimit ekonomik e financiar në DVP Gjirokastër, të cilët në përfundim të veprimeve të para hetimore kanë filluar procedimin penal ndaj 38-vjeçarit.

Materialet do t’i përcillen Prokurorisë, për veprime të mëtejshme, për veprën penale “Mosdeklarimi në kufi i të hollave dhe i sendeve me vlerë”.