Kallëzim penal ndaj Radojçiçit e Ushtrisë Serbe për plagosje e rrëmbim

Avokati nga Beogradi, Ivan Niniç, ka dorëzuar kallëzim penal ndaj pjesëtarëve të Ushtrisë Serbe dhe grupit të kryeterorristit Milan Radojçiç, për rastin e plagosjes dhe rrëmbimit të Milan Vukashinoviç që dyshohet se u bë nga xhandarmëria serbe e ndodhi në territorin e Republikës së Kosovës, në Leposaviç.

Niniç ka njoftuar se padia është bërë në emrin e nënës së Vukashinoviçit, pasi që për të nuk dihet asgjë që nga 1 nëntori. Kallëzimi penal është dorëzuar për kryerjen e veprës penale “vrasje në tentativë”.

“Për shkak se për pesë ditë askush nuk ka dhënë asnjë njoftim zyrtar lidhur me qëllimin me armë ndaj Milan Vukashinoviçit, unë, në emër të nënës së tij, kam dorëzuar kallëzim penal te Prokurori i Lartë Publik në Prokuplje, për veprën penale të vrasjes së rëndë në tentativë, kundër personave të panjohur — pjesëtarë të Ushtrisë së Serbisë, policisë ose grupit të Milan R.”, shprehet avokati nga Beogradi përmes rrjetit social X.

Sipas Policisë, incidenti dyshohet të ketë ndodhur brenda territorit të Kosovës, në hapësirën e njohur si “pika zero”, në afërsi të Leposaviçit, në Veri. Policia ka njoftuar se është në koordinim të ngushtë me KFOR-in, i cili ka konfirmuar se është në dijeni për incidentin dhe se situata në vijën kufitare është e qetë.

Përmes komunikatës, Policia e Kosovës sqaron:

“Disa persona të maskuar kishin hyrë në territorin e Republikës së Kosovës, duke e plagosur dhe rrëmbyer viktimën të cilët pastaj e kishin dërguar në territorin e Serbisë, ku sipas dëshmitarëve me një autoambulancë e kanë dërguar në drejtim të qytetit të Nishit.”