Kallëzimi i KLSH, Kryetari i Bashkisë Vlorë, Dritan Leli në SPAK
Kryetari i Bashkisë Vlorë, Dritan Leli sot është paraqitur në SPAK.
Mësohet se ndaj Dritan Lelit ka një kallëzim nga ana e Kontrollit të Lartë të Shtetit, KLSH, ndërkohë fati i i tij u kuptua edhe sot kur kryeministri Edi Rama e sulmoi hapur kryebashkiakun Leli për mbarëvajtjen e punës dhe çështjen e pastrimit në Vlorë.
“Kemi bashki si Vlora që ka pasur një vëmendje të veçantë me të drejtë nga qeveria por që ka një kryetar bashkie që fle gjumë. Vlora me gjithë potencialin dhe mbështetjen nuk duhej ta diskutonte të qenit xixë nga mëngjesi në mbrëmje. Minimalisht,” tha sot Edi Rama gjatë një takimi me kryetarët e bashkive, pak orë para se ai të trokiste në portën e Arben Krajës.
Pasi u mor në pyetje nga SPAK mbi një orë në lidhje me kallëzimin e KLSH, Kryetari i Bashkisë, Vlorë, Dritan Leli, nuk pranoi të japë detaje:
“Pyesni SPAK për më shumë informacione.”
Ndryshe, në fillim të muajit qershor u bë e ditur se përfundimin e kontrollit të ushtruar në bashki, në fushën e prokurimeve publike, Kontrolli i Lartë i Shtetit ka dhënë rekomandim me shkrim për shkarkimin e pesë punonjësve të bashkisë, pasi janë konstatuar shkelje në tenderime.
