“Kallëzimi nga Nesti Angoni”, reagon SPAK: Erion Veliaj akuzohet për korrupsion, pastrim parash…

Pas pesë orë qëndrimi dje në SPAK, Kryetari i Bashkisë Tiranë, Erion Veliaj, duke u shprehur para Këshillit Bashkiak se ishte kallëzuar një person me emrin Nesti Angoni, që sipa tij nuk ekziston ashtu si dhe kallëzimi, sot më në fund foli Prokuroria e Posaçme duke sqaruar se deri në këtë fazë të hetimit paraprak, ekzistojnë të dhëna konkrete, të cilat lidhen jo vetëm me veprën penale që ishte kallëzuar fillimisht nga shtetasi i vetëidentifikuar si N.A. – Korrupsion Pasiv!

Hetuesit e BKH-së, pas verifikimit të të dhënave dhe administrimit të provave dokumentare, referuan informacionin përkatës për veprën penale, mbi bazën e të cilit u rregjistrua procedimi penal, dhe nga provat e grumbulluara, është arritur në konkluzionin se ekzistojnë të dhëna konkrete, të cilat lidhen edhe me veprat penale: “Korrupsion aktiv i funksionarëve të lartë shtetërorë ose të zgjedhurve vendorë”, “Pastrimi i produkteve të veprës penale ose veprimtarisë kriminale” dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim”.

Këto vepra, sqaron SPAK, janë pasqyruar tashmë edhe në Rregjistrin e Njoftimeve të Veprave Penale pranë Prokurorisë së Posaçme kundër Korrupsionit dhe Krimit të Organizuar.

Ndryshe, dje Erion Veliaj u paraqit në SPAK në orën 08:55 dhe doli nga Prokuroria e Posaçme në orën 14:12, pas hetimit të pasurisë dhe sekuestrimit të telefonave të bashkëshortes dhe vëllait të tij nga ana e hetuesve të BKH.

Javën e kaluar Gjykata e Posaçme e Shkallës së Parë për Krime të Rënda rrëzoi kërkesën e bashkëshortes së Kryetarit të Bashkisë Tiranë, Ajola Xoxa, për kthimin e sendeve të sekuestruara gjatë kontrolleve të SPAK në banesën dhe biznesin e saj në qendrën “Harabel”.

GJKKO rrëzoi gjithashtu dhe kërkesën e vëllait të kryebashkiakut, Arbër Veliajt, për kthimin e sendeve të sekuestruara nga SPAK.

Ndërkohë, po dje Prokuroria e Posaçme njoftoi mbylljen e hetimeve për rastin e kompanisë “5D”, e cila sipas saj rezulton të ketë përfituar të paktën 12 gara publike, nga të cilat 7 në ndërmarrjen e Ujësjellësit ku dy të arrestuarit Redi Molla dhe Maringlen Qato, kishin funksione drejtuese. Ndërsa 5 tendera të tjerë janë fituar nga gara të shpallura nga Bashkia dhe agjenci të lidhura me të. Prokuroria ka ngritur akuzë për 7 persona, mes të cilëve Qato e Molla akuzohen për “Korrupsion”, “Mosdeklarim të pasurisë” dhe “Pastrim parash”.

Reagimi i SPAK:

Në përgjigje të interesit tuaj ju komunikojmë: Mbi bazën e informacionit për referimin e veprës penale i datës 08.02.2024- i përpiluar nga hetuesit e Byrosë Kombëtare të Hetimit (BKH), Prokuroria e Posaçme kundër Korrupsionit dhe Krimit të Organizuar ka rregjistruar Procedimin Penal nr.27/2024, i cili fillimisht bën fjalë për veprën penale: “Korrupsion pasiv i funksionarëve të lartë shtetërorë ose i të zgjedhurve vendorë” i parashikuar nga neni 260 i Kodit Penal.Informacioni për referimin e veprës penale mori shkas nga një kallëzim i bërë nga shtetasi i vetëidentifikuar si N.A. Hetuesit e BKH-së, pas verifikimit të të dhënave dhe administrimit të provave dokumentare, referuan informacionin përkatës për veprën penale, mbi bazën e të cilit u rregjistrua procedimi penal i mësipërm.

Deri në këtë fazë të hetimit paraprak, nga provat e grumbulluara, është arritur në konkluzionin se ekzistojnë të dhëna konkrete, të cilat lidhen jo vetëm me veprën penale të parashikuar nga neni 260 i Kodit Penal, por edhe me veprat penale: “Korrupsion aktiv i funksionarëve të lartë shtetërorë ose të zgjedhurve vendorë” i parashikuar nga neni 245, “Pastrimi i produkteve të veprës penale ose veprimtarisë kriminale” parashikuar nga neni 287/2 i Kodit Penal dhe “Refuzim për deklarim, mosdeklarim, fshehja ose deklarimi i rremë i pasurive, interesave privatë të personave të zgjedhur dhe nëpunësve publikë, ose i çdo personi tjetër që ka detyrim ligjor për deklarim” parashikuar nga neni 257/a, pgf 2 i Kodit Penal.

Këto vepra janë pasqyruar tashmë edhe në Rregjistrin e Njoftimeve të Veprave Penale pranë Prokurorisë së Posaçme kundër Korrupsionit dhe Krimit të Organizuar.