Kaloi Vettingun/ KPA shkarkoi gjyqtarin Astrit Faqolli. Ja arsyet…

Kolegji i Posaçëm i Apelimit, KPA, shkarkoi nga detyra gjyqtarin Astrit Faqolli.

KPA vendosi të shfuqizojë vendimin e Komisionit të Pavarur të Kualifikimit, i cili e kishte konfirmuar në detyrë gjyqtarin e Gjykatës së Shkallës së Parë, për shkak të pasurisë së pambështetur, arsye kjo për të cilën e kishte ankimuar edhe Komisioneri Publik.

Ndryshe, pasi KPK e konfirmoi në detyrë, Komisioneri Publik e ankimoi vendimin për gjyqtarin Astrit Faqolli, duke theksuar: 

“Në vlerësimin e Komisionerit Publik, në rastin konkret, konfirmimi në detyrë i subjektit të rivlerësimit nga Komisioni i Pavarur i Kualifikimit është bërë në interpretim të gabuar të ligjit dhe të provave të administruara gjatë hetimit administrativ.”

Problemet që u konstatuan 

Sipas Komisionerit Publik në vendimin e konfirmimit KPK është mbështetur në arsyetime dhe qëndrime jo të sakta, lidhur me kuptimin dhe zbatimin e ligjit.

Ankimimi i Komisionerit ka të bëjë vetëm me kriterin e pasurisë, për të cilin pretendon se nuk ka arritur nivelin e besueshëm.

Së pari, sipas Komisionerit Publik, Astrit Faqolli nuk arrin të mbulojë me të ardhura të ligjshme blerjen e një apartamenti në Tiranë, si dhe nuk justifikon burimet e deklaruara.

Si burim të krijimit ka deklaruar një shumë të marrë hua nga kunati, në vlerën e 10 mijë eurove dhe sipas Komisioneriti Publik, kunati nuk ka pasur të ardhura.

Gjithashtu, theksohet se gjyqtari nuk arrin të mbulojë me të ardhura të ligjshme kursimet e deklaruara. Referuar vendimit të Komisionit, gjyqtari ka deklaruar se kursimi prej 5.000.000 lekësh ka burim kryesor të ardhurat nga aktiviteti privat i bashkëshortes.

Edhe për kursimet e deklaruara në vitet 2004-2005, gjyqtari nuk arrin t’i justifikojë. Me probleme, sipas Komisionerit, rezulton edhe shitja e një makine të deklaruar si burim për këtë pasuri.

Në fund, Komisioneri Publik u shpreh se Astrit Faqolli nuk mbulon me të ardhura të ligjshme blerjen e apartamentit për një shumë totale prej rreth 2.4 milionë lekësh.

Së dyti, probleme sipas Komisionerit Publik, janë konstatuar edhe në pasurinë shtëpi 3-katëshe në Librazhd.

Komisioneri tha se gjyqtari ka bërë deklarim të pamjaftueshëm. Po ashtu, të dyja burimet e deklaruara për krijimin e të ardhurave në vlerën prej 2.983,619 lekësh, që kanë shërbyer për fitimin e pronësisë së pasurisë së paluajtshme, nuk mbulohen me të ardhura të ligjshme.