Kampet e Refugjatëve/ Ja reagimi zyrtar i Ministrisë së Brendshme: Deklaratat janë hipotetike…

Ministria e Brendshme ka reaguar lidhur me deklarimet e zv.ministrit Julian Hodaj, që gjatë një interviste për ZDF foli për kampe refugjatësh dhe mundësitë që ka Shqipëria për të përballuar një fluks të tillë.

Por, sipas në reagimi të Ministrisë së Brendshme ndërtimi i kampeve për imigrantë nuk është një çështje në shqyrtim apo në diskutim. “Askush nuk e ka kërkuar deri më sot dhe askush nuk e ka ofruar një gjë të tillë”, thotë ministria në një njoftim për mediat.

Ja reagimi i Ministrisë së Brendshme

Nisur nga jehona mediatike e një kronike televizive të rrjetit gjerman ZDF, në datë 19.06.2018, me qëllim evitimin e spekulimeve dhe keqpërdorimeve të përmbajtjes së kësaj kronike, Ministria e Brendshme sqaron se:

– Ndërtimi i kampeve për imigrantë nuk është një çështje në shqyrtim apo në diskutim. Askush nuk e ka kërkuar deri më sot dhe askush nuk e ka ofruar një gjë të tillë.

– Thëniet e zv.ministrit Julian Hodaj, të cituara në kronikë janë përgjigjja e një pyetje konkrete:
“Çfarë mund të bënte Shqipëria në kushtet e një emergjence imigrantësh?”

Përgjigjja e kësaj pyetjeje është ajo që citohet: “Shqipëria e ka treguar gjatë luftës së Kosovës se është në gjendje të përballojë këto emergjenca”.

Pra përgjigjja lidhet me një situatë hipotetike humanitare emergjence, si ajo gjatë luftës së Kosovës ku pati një angazhim shtetëror e popullor, dhe jo mbi një diskutim nëse një kamp mund të ndërtohet ose jo në Shqipëri.