Kampet e refugjatëve? Rama flet nga sheshi që u përmbyt: Lajm i rremë…

Lajme të rreme i ka cilësuar Edi Rama, Kryeministër i Shqipërisë, ato që kanë të bëjnë me ndërtimin e kampeve të refugjatëve dhe akomodimin në vend të rreth 600 mijë të tillëve.

Në një ceremoni në sheshin Skenderbej, lidhur me çmimin e dhënë në Barcelonë për të si hapësirë publike, vetëm 48 orë pas përmbytjes së sheshit dhe rrugëve qendrore të Tiranës, Rama zgjodhi të bëjë një koment të shkurtër lidhur me atë çka debatohet prej më shumë se dy javësh.

Rama theksoi se nuk ka anjë gjë të vërtetë në atë që flitet për kampet, edhe pse një prej deputetëve gjermanë ka konfirmuar se oferta për ndërtimin e tyre ka ardhur nga qeveria shqiptare.

“Kritikët e quajtën një projekt kriminal të bazuar te ethet e një fitimi marramendës për shkak se sheshi nuk do ishte gjë tjetër veçse një zonë e aktiviteteve ekonomike të atyre që do të përfitonin nga pushteti për të ndërtuar në shesh një Pazar. Ka qenë një nga mijëra lajmet e rreme që e bënë Shqipërinë djep të fake-neës. Ka qenë një lajm i rremë njësoj siç është sot lajmi për kampin e refugjatëve, apo të tjera lajme të rreme të cilat i dëgjojmë të përhapen dita-ditës.

Shumë vite më parë kur isha kryebashkiak, më kujtohet një takim me një gazetare italiane e cila më tha: kam ardhur disa herë në Shqipëri për të bërë një reportazh pozitiv, por nuk kam mundur dot të bëj një fotografi të vetme në Tiranë që të justifikonte fjalët e mira dhe tu tregonte atyre që mund ta vizitojnë Shqipërinë, që ta vizitojnë. Shumëkush që mendon se kjo është fasadë, shumëkush mendon se bukuria është e panevojshme në kushtet kur një shoqëri ka probleme të tjera. nuk ekziston në planet një vend i shëmtuar që është edhe i pasur.

Problemi i Shqipërisë nuk është buka dhe uria, por shumë probleme të tjera që kanë të bëjnë me fëmijët, me të moshuarit, me gjithë mundësinë për të pasur akses për zhvillimin individual dhe familjar”, tha Rama.