Kampi pro demokracisë fiton zgjedhjet lokale në Hong Kong

Udhëheqësja ekzekutive e Hong Kongut, Carrie Lam, tha se qeveria “do të reflektojë seriozisht”, pasi kandidatët pro demokracisë shënuan fitore masive në zgjedhjet lokale.

Sipas mediave lokale, 17 nga 18 këshillat e qarqeve do të kontrollohen tani nga këshilltarët pro demokracisë, raporton RFE pwr zgjedhjet ku pjesëmarrja ishte mbi 71 për qind.

Zgjedhjet e së dielës në Hong Kong kanë qenë të parat prejse ka nisur vala e protestave kundër regjimit të Pekinit, gati gjashtë muaj më parë.

Rezultati shihet si një qortim i ashpër ndaj zonjës Lam dhe si shfaqje e mbështetjes për lëvizjen protestuese.

Në deklaratën e lëshuar sot, Lam tha se qeveria do ta respektojë atë duke shtuar se shumë mendojnë se rezultati “pasqyron pakënaqësinë e njerëzve me situatën aktuale dhe problemet e thella në shoqëri”.

Këshilltarët e rretheve kanë pak fuqi politike dhe kryesisht merren me çështje lokale, siç janë rrugët e autobusëve dhe mbledhja e mbeturinave.

Por, këshilltarët gjithashtu duhet të zgjedhin 117 vetë nga rrethet e tyre, për t’u ulur në komitetin prej 1.200 anëtarësh që zgjedh shefin ekzekutiv të Hong Kongut. Ndryshe, Hong Kongu është pjesë e Kinës në bazë të politikës “një shtet, dy sisteme”. Ai ka disa të drejta që nuk i gëzon pjesa tjetër e territorit kinez, por protestuesit ankohen se ato po kufizohen gjithnjë e më shumë nga regjimi në Pekin.