“Kampioni i Edi Ramës” në burg, Kryeministri: 100 herë të kthehesha pas…

Pas vendimit të GJKKO për të dënuar me 3 vite e 4 muaj burg Ish-Ministrin e Brendshëm, Saimir Tahiri, Kryeministri Edi Rama tha se sikur 100 herë të kthehej pas, do bënte të njëjtën gjë me reformën në drejtësi ndërsa faktin se “Kampioni” i tij është në qelinë e burgut 313 për shpërdorim detyre nuk e komentoi me arsyetimin se “nuk komenton vendimet e gjykatave”.

“Unë nuk komentoj asnjëherë vendimet e gjykatave. E kam ditur mirë se çfarë kam bërë kur kam udhëhequr reformën në drejtësi. 100 herë të kthehesha pas, do bëja të njëjtën gjë. Sot jemi këtu për një çështje krejt tjetër, dhe me një vlerë shumë pozitive për Shqipërinë. Unë nuk do të doja të shfokusoheshim nga kjo çështje. Do kemi plot kohë e mundësi të tjera të flasim edhe për ecurinë e reformës në drejtësi,” tha Kryeministri Edi Rama duke u munduar të bind të paktën gazetarët prezent se më i rëndësishëm është konflikti mes Ukrainës dhe Rusisë se sa vendimi banal i GJKKO për shpërdorim detyre të Ish-Ministrit të Brendshëm që SPAK e akuzoi për trafik ndërkombëtar të drogës dhe grup të strukturuar kriminal.

Ndryshe, nga momenti kur zyrtari policor, Dritan Zagani, e akuzoi për trafik droge e deri në arrestimin e tij, Kryeministri Edi Rama e vlerësoi Saimir Tahirin fillimisht si “Kampion”, e mori si pjesë të delegacionit në Shtëpinë e Bardhë ku u takua me Presidentin Obama, për të përfunduar në “pishmanin më të madh politik”.