Kampusi i ri Universitar/ Salla e tradhëton kryeministrin, Edi Rama nxjerr studenten jashtë – duartrokitet…

Prezantimi i projektit të Kampusit të ri Universitar, sot është shoqëruar me një incident, ku Edi Rama edhe të vetmen studente që mendonte ndryshe nga ai e nxori jashtë.

Në momentin kur Edi Rama po mundohej të bindë të pranishmit se godinat nuk janë bërë me kushte për studentët sepse ishte çështje mundësish dhe jo dëshirash, një studente ka reaguar në sallë duke i kujtuar Ramës se paguhet me taksat edhe të saja e kryeministri përsëriti skenën e një dite më parë kur nuk e lejoi të flas as të vetmen pedagoge që mendonte ndryshe nga ai:

“Jo se po flas unë, të drejtën për të folur, suksese, tani, suksese, tani dil jashtë, tani. Kaq, tani dil jashtë, ashtu,” tha Edi Rama të cilin salla e tradhtoi me duartrokitje në një sallë ku thuhej se po merrnin pjesë studentë dhe jo fresshistë, e ai vazhdoi:

“Tashti ti del jashtë dhe ne vazhdojmë punën. Sepse ju keni të gjitha të drejtat të ngrini probleme, por nuk mund të përmbysni historinë e bashkëjetesës mes njerëzve që ka norma të padiskutueshme, ndërprerja e tjetrit kur flet apo prishja e një bashkëbisedimi është mungesë aftësie për të bashkëjetuar në demokraci. Vajza që nda nderoi me daljen e vet përjashta, ajo nuk paguan taksa.. janë prindërit, edhe ato nuk dihet nëse i paguajnë apo jo”.

Flet studentja që Rama e nxori jashtë…

 Studentja që u përplas sot me kryeministrin, Klodiana Agaj sqaroi se në takim me Edi Ramën nuk ishin të pranishëm studentët që janë kundër Paktit për Universitetin sepse nuk ishin njoftuar për këtë takim.

“Shumë studentë nuk ishin të pranishëm pasi nuk ishin njoftuar. Kryeministri Rama ishte duke folur me superlativa për Ligjin e Arsimit të Lartë dhe në atë moment doja që të ndërhyja. Pyetja ime ishte se kur do të plotësoheshin kërkesat dhe kur do të rrëzohet Ligji i Arsimit të Lartë. Sa kohë që Universiteti nuk ka të ardhura të tjera, me uljen e tarifave të Bachelor do të duhet të rriten tarifat që paguhen në master,” u shpreh Klodiana Agaj për Fax Neës duke shtuar se nëse Universitetet janë në varësi të ministrive atëherë ku është ekonomia.

“Studentët e kanë të vështirë që të përballojnë jetesën e tyre kur vijnë në Tiranë. Librat janë të kushtueshëm, fotokopjet janë të vështira për tu realizuar për shkak se ligjërisht është e paligjshme,” tha studentja e gazetarisë duke sqaruar se nisma e tyre është mbështetur edhe nga pedagogët, që të hënën kanë paralajmëruar nisjen e një greve:

“Çdo ditë kemi vendosur që të diskutojmë gjatë ngujimit dhe bojkotit, ku ka pasur të pranishëm dhe aktivistë, apo pedagogë,” Klodiana Agaj ndërsa shtoi se protesta e tyre do të vijojë dhe shumica e studentëve kërkojnë që të mos rinisë mësimi pa u plotësuar 8 kërkesat.Ndryshe, me rastin e prezantimit të projektit të Kampusit të ri Universitar ishin prezent ministrja e re e Arsimit, Besa Shahini dhe kryetari i Bashkisë së Tiranës, Erion Veliaj.