Kanabis dhe Amnisti fiskale, Edi Rama: Shqiptarët janë të çuditshëm!

Kryeministri Edi Rama sot në një dalje publike foli për Projektligjin për legalizimin e kanabisit ndërsa sqaroi dhe procesin e amnistisë fiskale, siç e ka mendar Qeveria e Shqipërisë duke dhënë një konstatim jo të padëgjuar nga goja e tij: Shqiptarët janë të çuditshëm!

“Ju kujtoj që për legalizimin e kanabisit mjekësor e kemi konsultuar me shqiptarët dhe në këshillimin kombëtar kanë marrë pjesë gati gjysmë milionë shqiptarë që kanë thënë po, do bëhet. Në këshillimin e ardhshëm do i pyesim edhe nese doni të legalizohet dhe përdorimi rekreativ i kanabisit apo jo, do i pyesim, pra për përdorimin personal.

Apo do vijojë të jetë krim që dënohet dhe që çon fatkeqësisht shumë të rinj në burg. Nëse do thonë po do e bëjmë edhe atë, se kemi një dilemë për këtë gjë. Po të më pyesni mua tani, e po t’u hap mendjen e zemrën do shikoni që jam i dyzuar në këtë pikë. Dhe në diskutimet e brendshme ka pro e kundër, ndaj është këshillimi kombëtar,” tha Edi Rama ndërsa u mundua të sqaroi procesin e amnistisë fiskale.

“Edhe kur merr makinën, me gjithë dokumentet në rregull, ka gjithmonë një risk. Çdo gjë ka risk, por e rëndësishme është që së pari amnistia fiskale është një kërkesë e kohës, e mbështetur gjerësisht në opinionin publik. Së dyti, amnistinë fiskale jemi të fundit që e bëjmë. Së treti, ua kam thënë dhe partnerëve, mirëpresim çdo vërejtje.

Shqiptarët janë të çuditshëm. Kemi bërë një projekt me të gjitha masat e marra nga ligjet e amnistisë së vendeve të tjera për të parandaluar keqshfrytëzimin e kësaj mundësie. Është shumë e qartë që amnistia nuk i jep askujt amnisti, përveçse deri në ditën e depozitimit të parave. Pra, kushdo qoftë që nuk është i dënuar, që nuk ka punuar në shtet, që nuk ka qenë politikan, etj. etj. janë një sërë kategorish të përjashtuara, pra që mund të kenë burime korrupsion në pasurinë e tyre, apo krimi, për gjithë pjesën tjetër amnistia është në fuqi.”

Nuk është se amnistia të jep mundësi që çfarëdo që të bësh në të ardhmen, paratë nuk të preken, u tha Rama shqiptarëve të çuditshëm.

“Këtu bëhet fjalë për qindra e mijëra emigrantë që kanë para, që nuk i legalizojnë dot, sepse janë kursime nga puna në të zezë, jo nga puna e zezë. Shikoni çfarë heqin për të sjellë 10 mijë euro apo 10 mijë paund. Madje edhe me prokurë, që iu marrin dhe ndonjë lekë për të marrë lekët e tyre. Kjo është amnistia”, u shpreh kryeministri.”

Me këtë rast, pas Samitit të NATO-s, Kryeministri tha se në Portin e Durrësit, në Porto Romano, përveç pjesë komerciale dhe tregtare, parashikohet të ndërtohet dhe një bazë ushtarake e NATO-s, për të cilën i është bërë ftesë Aleancës për ta financuar.

“Atje kemi folur edhe për projektin tonë dhe së shpejti do të rikthehemi në Bruksel për të vazhduar diskutimin për propozimin tonë që ka ngjallur interes dhe dëshirë për të thelluar bisedimet për instalimin e një baze navale të NATO-s në portin e ri të Durrësit, që do të jetë në Porto Romano dhe veç pjesës komerciale, parashikohet të ketë dhe një pjesë ushtarake.

Së shpejti do të bëjmë një takim të posaçëm për këtë çështje me ekipin tonë të ekspertëve dhe të aleancës, për të parashtruar në detaje projektin. NATO ka hyrë në fazë të re të bashkëfinancimit të projekteve të posaçme, aktualisht po ndërtohet baza taktike e NATO-s ne Kuçovë, financim i huaj, ndërsa porti, ne natyrisht do financojmë vetë pjesën komerciale dhe kemi ftuar NATO  për bashkëfinancim në bazën ushtarake”, tha Kryeministri Edi Rama i shoqëruar nga Ministrja e Jashtme, Olta Xhaçka, së cilës edhe një pyetje që një gazetar guxoi ti bëjë u largua për tre muajt e ardhshëm, e Kryeministri i bëri të qartë se nuk është i mirëseardhur në asnjë konferencë shtypi.