Kandidat për ambasador, Mustafa Nano: Do kuroj marrëdhëniet mes shteteve! Gjekmarkaj: Preferoj një me eksperiencë, jo anonim!

Prezantimi për ambasador të Shqipërisë në Zvicër, i Mustafa Nanos, nuk u prit mirë nga opozita në Komisionin për Politikë të Jashtme, e cila e cilësoi si një anonim që nuk i çon asnjë peshë Shqipërisë madje e shëmton shërbimin diplomatik.

“Është moment i veçantë, sepse kam më shumë se dy dekada që nuk e kam menduar se do ndodhesha në këtë detyrë. Nuk e kam aspiruar këtë pozicion. Por megjithatë shpresoj që detyra e ambasadorit që unë po kërkoj të jetë po ashtu interesante, por nuk kam dyshime sidomos edhe për faktin që do të jem në Zvicër, (nëse do të zgjidhem), sepse është një vend që e dua shumë dhe e kam dashur gjithmonë… besoj bini në një mendje me mua që është një vend i mrekullueshëm,” tha Mustafa Nano para Komisionit për Politikë të Jashtme duke u zotuar se do kuroj marrëdhëniet mes dy shteteve

“Është një vend i mirë për të bërë detyrën e ambasadorit sepse ka një komunitet shqiptarësh aty. E kam përfytyruar punën e ambasadorit si një detyrë të fisshme dhe shumë aktiv në vendin ku është. Do kuroj marrëdhënie mes dy shteteve, do ta bëj këtë me dëshirë dhe me zell.”

Por Nënkryetari i Komisionit për Politikë të Jashtme, Agron Gjekmarkaj, tha se do preferonte një kandidat me eksperiencë dhe jo një anonim që do shëmtoj shërbimin diplomatik.

“Do preferoja një të ministrisë së Jashtme që ka 30-40 vite eksperiencë, përballë një anonimi nga jeta publike që mund të jetë hyzmeqar i dikujt, që nuk i çon asnjë peshë Shqipërisë por e shëmton shërbimin diplomatik.”