Kandidatët e kualifikuar për BKH, Yuri Kim: Reforma në Drejtësi po ecën përpara!
Pasi Ambasada e SHBA sot uroi të aplikantët e kualifikuar për Byronë Kombëtare të Hetimit që do të nisin trajnimin, Ambasadorja amerikane, Yuri Kim, tha se Reforma në Drejtësi nuk është e lehtë, e shpejtë dhe e përsorur, por ecën përpara edhe nëse njerëzit e këqij nuk e duan atë.
“SPAK po procedon më shumë, duke kapur pasuri dhe duke vendosur kriminelët pas hekurave; Gjykata Kushtetuese po funksionon. Gjykata e Lartë është duke shqyrtuar raste. Vettingu vazhdon. Inspektorët e BKH po trajnohen. Reforma në Drejtësi nuk është e lehtë, e shpejtë ose e përsosur,” tha Ambasadorja e SHBA në Tiranë duke përfunduar:
“Por po ecën përpara edhe nëse njerëzit e këqij nuk e duan atë.”
Ndryshe, dje Komisioni i Posaçëm i Verifikimit të Pasurisë dhe Figurës mbylli verifikimin e kushteve të sigurisë për kandidatët që konkurrojnë për “Hetues” në Byronë Kombëtare të Hetimit dhe ka vendosur që nga 37 kandidatë, 28 të kalojnë kushtet e sigurisë. Verifikimi i kushteve të sigurisë u zhvillua nën vëzhgimin dhe monitorimin e Komisionit të Pavarur të Rishikimit, të caktuar nga misionet e Qeverisë së Shteteve të Bashkuara të Amerikës dhe Bashkimit Europian në Shqipëri. Kandidatët e kualifikuar do ti nënshtrohen trajnimit me një sërë modulesh vlerësimi që duhen kaluar përpara se të çertifikohen.
