Kandidatët për Kryetar të PD nuk dorëzuan emrat e Komisionerëve, Gjana: Agron Shehaj solli listë blof!

Ndonëse kanë mbetur vetëm edhe dy ditë, me përjashtim të Lulzim Bashës tre kandidatët tjerë për kryetar të ri të Partisë Demokratike nuk kanë dorëzuar emrat e përfaqësuesve në 76 Komisionet e votimit në gjithë vendin për zgjedhjet e 13 Qershorit.

Kryetari i Komisionit të Zgjedhjeve në Partinë Demokratike, Jemin Gjana, duke folur për ecurinë e përgatitjes për zgjedhjet e 13 Prillit për kryetar të PD, tha se edhe njëri prej kandidatëve, Agron Shehaj, që dorëzoi një listë, ajo rezultoi blof pasi rezultoi se këta anëtarë të Komisioneve nuk ishin pjesë e PD.

“Përfaqësuesit e kandidatëve të tjerë nuk kanë sjellë asnjë emër që do i përfaqësojë në 76 komisionet e votimit. Është zhvilluar një diskutim i gjatë, madje njëri nga kandidatët, Shehaj dorëzoi pardje një listë që pasie verifikuam rezultuan se askush prej tyre nuk ishte anëtar i PD, është një listë blof, e papranueshme të bëhen lojëra të kësaj natyrë. Plotësimi i Komisioneve me përfaqësues të kandidatëve është e drejtë, jo detyrim. Nëse duan ta shfrytëzojnë, deri më tani po e zvarrisin përtej çdo kufiri dhe mbrëmë e kemi bërë të qartë, asnjë emër nuk mund të shkojë në Komision pa u verifikuar nga Komisioni Zgjedhor,” tha Jemi Gjana duke shtuar:

“Ne do presim deri në minutat e fundit, por në asnjë rast nuk do të delegohet pa bërë verifikimet. Asnjë emër nuk mund të shkojë në Komision pa u verifikuar nga Komisioni i PD, një njeri që ka shkuar të shoqërojë kandidatin për deputet të Murrizit apo Patozit, është i ditur që ka qenë në fushatë dhe s’mund të marrë pjesë. Ata që kanë bërë fushatë të fshehtë, nuk mund të hyjmë në shpirtin e secilit.”

Me këtë rast Kryetari i Komisionit të Zgjedhjeve në Partinë Demokratike sqaroi se janë përcaktuar kush konsiderohen vota të vlefshme dhe të pavlefshme si dhe është miratuar udhëzimi për votimin e anëtarëve të PD të cilët nuk e kanë emrin në lista, por disponojnë dokument anëtarëve.

“Nuk do u mohohet kjo e drejtë, por do ketë disa kushte dhe disa përjashtime. Kushtet do të jenë që do të paraqiten pranë qendra me dokumentin e anëtarësisë dhe me kartën e identitetit. Komisioni ka për detyrë që të regjistrojë në një formularë të posaçëm emrin atësinë dhe mbiemrin, nr e identifikimin, numrit të telefonit dhe të marrë firmën dhe kartat e anëtarësisë do të mbeten te Komisioni që do i depozitojë në Komision bashkë me materialet e tjera. Këto karta në një procesverbal të posaçëm do ua dorëzojë Sekretarit Organizativ që brenda 1 muaji do i regjistrojë në sistem, të nxjerrë kartat e reja dhe t’i pajisë me kartat e reja të anëtarësisë dhe më pas do i kthejnë dokumentin e vjetër,” tha Jemi Gjana duke e bërë të qartë se përjashtohen ata anëtarë që në fushatën e fundit zgjedhore kanë qenë anëtarë, komisionerë, vëzhgues apo aktivistë të partive të tjera jashtë koalicionit të PD me aleatët.