Kandidati i “Shtëpisë lirisë”: S’premtoj mrekulli, por ndryshimi do të vijë në Dibër!

Nuk mund të premtoj mrekulli për një mandate kaq të shkurt, por rëndësia është tek ndryshimi që do të vijë në Dibër, tha kandidati i “Shtëpisë së lirisë”, Përparim Kryemadhi, para banorëve të Maqellarës duke i konsideruar zgjedhjet e pjesshme të 6 Marsit si zgjedhje të veçanta.

Ndërkohë për liderin historik të PD-së, Sali Berisha, 6 Marsi është një provë e madhe për opozitën e vërtetë shqiptare në tërësi, sepse ato mbartin mesazhin e fillimit të një ndryshimi të madh. Ndërsa prezantoi kandidatin e “Shtëpisë së lirisë” për Dibrën, ai tha se vota dhe besimi i dibranëve për Premtimin do kthehet në shërbim për ata vetë ndërsa garantoi se Premtim Kryemadhi do jetë një shërbëtor i bindur dhe i përkushtuar i tyre.

“Vij këtu sot me bindjen time të plotë se mbështetja juaj për Premtim Kryemadhin, njëri nga bijtë e përkushtuar të Dibrës, intelektual, familjar dhe demokrat që në ditët e para të themelimit të PD-së, zyrtar i ndershëm dhe i përkushtuar, njeri të cilin demokratët e Dibrës e zgjodhën me votën e tyre të lirë. Vota dhe besimi juaj për Premtimin do kthehet në shërbim për ju. Premtim Kryemadhi do jetë një shërbëtor i bindur dhe i përkushtuar i juaji,” tha Sali Berisha duke shtuar se zgjedhjet e 6 Marsit mbartin mesazhin e fillimit të një ndryshimi të madh.

“Zgjedhjet e 6 marsit janë një provë e madhe jo vetëm për kryebashkiakët që do zgjidhen, por janë një provë e madhe për opozitën e vërtetë shqiptare në tërësi. Ato mbartin mesazhin e fillimit të një ndryshimi të madh. Ato mbartin në vete, farën e shpresës për të cilën ka sot nevojë më shumë se për çdo gjë tjetër, familja shqiptare, të rinjtë shqiptarë.

Ne jemi në këto vite, një shoqëri në shpërbërje, vite në të cilat të rinjtë dhe fëmijët largohen nga familjet. Lënë prindërit vetëm dhe vetë marrin rrugë pa ditur se cila do jetë e ardhmja e tyre. E gjitha kjo jo se Maqellara, Dibra dhe Shqipëria nuk kanë pasuri, nuk kanë potenciale për të begatuar, për të punësuar, për të garantuar të ardhmen e të rinjve dhe fëmijëve të tyre, por sepse ndiqen politika të cilat janë absolutisht të ngjashme me platformën e Vaso Çubrilloviçit në Kosovë ndaj shqiptarëve.”

E pashmangshme ishte çështja e inceneratorëve:

“Besoj e keni marrë vesh se 420 milion euro janë dhënë për tre djegësa, sot asnjëri nuk punon. Çfarë ka ndodhur? Me thes kanë vjedhur. Po kush? Askush me në krye kryeministrin. Të marrësh paret me qindra milionë euro nga buxheti, nuk i prek kush pa lejen e kryeministrit. Ai është gardiani.

Komisionin hetimor e mbyllën para një muaji dhe kur i denoncova në parlament, u detyruan ta rikthejnë përsëri vetëm për luftë të brendshme midis njëri-tjetrit.

U ndala te kjo aferë ndër më të mëdhatë në 30 vite për t’u thënë se nëse kjo qeveri do kishte investuar 420 milion euro në kanale ujitëse ju garantoj që të gjitha kanalet vaditëse kudo në vend do ishin rindërtuar nga e para. Por ato para duheshin përvetësuar dhe nuk kishte pse t’u jepeshin fermerëve,” tha Berisha duke shtuar.

“Më 6 mars duhet të votojmë për shpresën. Ndaj dhe duhet të votojmë për ndryshimin. 5 kryetarë bashkie, në mënyrë të turpshme, ndërroi qeveria e Edi Ramës në Dibër këto vite,” tha Sali Berisha duke premtuar:

“Nuk do lejojmë ndërtimin e Skavicës. Kjo trevë nuk përmbytet kurrë. Ajo do qëndrojë siç e ka bërë Zoti. Të harrojnë se do përmbysin një pëllëmbë tokë. Nëse duan të ndërtojnë Skavicën, e kanë projektin. U them të heqin dorë, nuk përmbytet Dibra. Ajo u ka rezistuar pushtuesve në mënyrën më heroike. Edi Ramën nuk e ka gjë fare.” 

Në fund, lideri historik i PD përgëzoi dibranët që kapën kriminelët duke blerë vota:

“Kam një përshëndetje për ju që kapët atë atë kriminelin që blinte vota këtu në Maqellarë. Po ku është ai sot? Është i lirë, pasi Lulzim Brava ju tradhtoi. Nëse do mbronte votat siç i mbrojtën demokratët e Maqellarës, do ishim në pushtet. Po ai e kishte mendjen që të qeveriste me Ramën. Në fakt, atë Rama e kishte marrë peng. Kjo është e vërteta absolute”.

Para qytetarëve të Maqellarës, Përparim Kryemadhi ishte i qartë se si do të vijë ndryshimi!

“Në 7 vite, Dibra ka ndërruar 5 kryetarë bashkie, pra çdo vit ne kemi qenë në zgjedhje. Jo vetëm kryetarë bashkie, por edhe një fenomen tjetër: Ne udhëhiqemi nga njerëz që na vijnë nga Tirana jo vetëm për bashkitë, por edhe për drejtoritë rajonale: drejtor policie, drejtor dogane, drejtor spitali. Po dibranët ku janë? Ku janë, që të drejtojnë këto funksione?!

A keni parë këto ditë se si është turrur e gjithë administrata, duke filluar nga ministrat, Manja dhe Balluku, me drejtorë, prefektë, nënprefektë, kryetarë bashkie, për të mbështetur këtu kryetarin e PS-së?! Kjo ndodh sepse ata kanë frikë nga ju, sepse gjithë këto vite nuk qeverisën,” tha Premtim Kryemadhi duke mos premtuar mrekulli por ndryshim të sigurtë:

“Si ndryshohet gjendja?! Këto ditë nuk duhet ndaluar, duhen takuar njerëzit dhe në datën 6 Mars t’i japim ndryshimin këtij vendi.

Këto zgjedhje janë të veçanta. Mandati është vetëm 1 vit e disa muaj. Natyrisht unë nuk mund të premtoj mrekulli për një mandate kaq të shkurt, por rëndësia është tek ndryshimi që do të vijë për të gjithë Shqipërinë, që nuk erdhi për faj të marrëveshjeve që kanë ndodhur. Ky ndryshim është i rëndësishëm, që të zbardhet i gjithë aktiviteti i bashkisë Dibër. E dini që është një-shi i borxhit publik dhe ka një person që mban përgjegjësi për këtë,” tha Përparim Kryemadhi ndërsa lideri historik Sali Berisha bëri thirrje:

“Ftoj demokratët e Dibrës të bashkohen të gjithë: asnjë votë kandidatit të Lul Bravës. Çdo votë për të është humbje për PD-në. Logoja e vërtetë e jona është Shtëpia e Lirisë. Duhet të falënderoj aleatët e mi që janë sot këtu. Shpreh bindjen e thellë se së bashkë me aleatët do shënojmë një fitore të shkëlqyer në Dibër dhe në bashkitë e tjera. Revolucioni ynë nuk ndalet. Ne do ecim të sigurt drejt përmbytjes të këtij shteti të bazuar te krimi, vjedhja dhe korrupsioni. Ne do rikthejmë në pushtet PD-në dhe opozitën e vërtetë shqiptare.”