Kandidati i “Shtëpisë së lirisë” në Dibër: Dibranët, i dhanë ndryshimin më 25 Prill, PD e keqmenaxhoi

Kandidati i koalicionit “Shtëpia e lirisë” për Dibrën në zgjedhjet e pjesshme vendore të 6 Marsit, Premtim Kryemadhi, tha para banorëve të Fushë Alies se dibranët i dhanë ndryshimin Partisë Demokratike më 25 Prill, por kjo parti e keqmenaxhoi dhe nuk respektoi votat, vullnetin, mundin dhe djersën jo vetëm të demokratëve por e gjithë qytetarëve të Dibrës. Dhe, atë ndryshim që nuk e sollën për 8-9 vite me gjithë sakrificën, Premtim Kryemadhi bëri thirrje që duke u bashkuar të shpëtohet bashkia nga kjo keqqeverisje e së majtës. 

Duke përshëndetur liderin historik të PD, Sali Berisha, prezent në këtë takim, kandidati i koalicionit “Shtëpia e lirisë”, Premtim Kryemadh shtoi:

“Dr. Berisha, mirëseerdhët në Fushë Alie, mirëseerdhët në vendin e besës dhe të patriotizmit!

Ju përshëndes edhe njëherë sot ju, jo vetëm për praninë, por dhe për mbështetjen që i keni dhënë PD-së në vite. U tha këtu sot se Doktori është në një vend bastion të PD në të gjithë historinë e kësaj partie. Jam i nderuar që erdha këtu pasi dola nga një proces model i pastër i Foltores dhe votuat për kandidatin që do t’ju përfaqësonte.

Dibranët, jo vetëm demokratët, ia dhanë ndryshimin më 25 Prill, Partisë Demokratike, por kjo parti për shkak të keqmenaxhimit nuk diti ta sjellë apo t’ia japë qytetarëve ndryshimin.

2200 vota më tepër i dhamë Partisë Demokratike më 25 Prill – vetëm një deputet kemi në parlament!  Dy deputetë ka Mati – me 1000 vota minus për PD-në! Kjo është që të mos respektohet vota vullneti mundi dhe djersa jo vetëm e demokratëve por e gjithë qytetarëve të Dibrës,” tha kandidati i koalicionit “Shtëpia e lirisë”, Premtim Kryemadhi, duke përfunduar:

“Gjej rastin t’iu bëj thirrje sot atyre demokratëve me të cilët deri dje qemë në një front, që për momentin janë pozicionuar në krahun tjetër, të vijnë tek shumica, tek vullneti i qytetarëve për ndryshim, të vijnë që të sjellim atë ndryshim që nuk e sollën për 8-9 vite me gjithë sakrificën tonë. Bashkohuni që të heqim bashkinë nga kjo keqqeverisje e së majtës.” 

Ndërsa lideri historik i Partisë Demokratike para banorëve të Fushë Alies në Dibër duke prezantuar kandidatin e “Shtepisë së Lirisë”, Premtim Kryemadhi, garantoi dibranët se besimin e tyre ai do ta shndërrojë në punë dhe përkushtim.

“Kërkoj mbështetjen tuaj, për një bir të Dibrës, njërin mes jush, mësues, intelektual, Premtim Kryemadhin. Një demokrat i orëve të para. Besimin tuaj, ai do ta shndërrojë në punë dhe përkushtim. Dibra në këto 8 vite është përçmuar nga qeveria e Ramës. Ajo ka ndërruar 5-6 kryetarë bashkie, sepse ata nuk meritojnë që të qeverisin asnjë ditë në Dibër,” tha Sali Berisha para demokratëve dibranë të cilëve ju rikujtoi dhe vlerën që ka Oda e Dibrës:

“Kam një mik ndër më të afërt, një ish ministër britanik. Gjatë një takimi në Tiranë, po u tregoja për kanunin dhe rregullat dhe miku britanik u tha të gjithë të pranishmëve: Universiteti më i madh i jetës time, ka qenë oda e Dibrës. Dhe ai tha një të vërtetë. Ai kishte mbaruar universitetin më të mirë të Britanisë dhe ishte i biri i guvernatorit të fundit britanik në Indi, por ishte mahnitur me logjikën dhe urtësinë në odën dibrane,” tha Sali Berisha duke përfunduar:

“Në këto 8 vite, qeveria e Tiranës ngriti qëndrime armiqësore, jo vetëm ndaj veriut në veçanti, por ndaj gjithë shqiptarëve.”