Kandidati për Kryeprokuror, Çela në KLP: Ka avokatë që firmosin ku ju kërkohet, prokurorët burgosin njerëzit “e dobët”…
Kandidati për Prokuror të Përgjithshëm, Olsian Çela, tha sot në KLP ndërsa shpalosi vizionin e tij se prokurorët kanë aplikuar masa penale të ashpra në veçanti me shtresat e dobëta. Ka avokatë, tha ai, të cilët firmën e hedhin atje ku u kërkohet e jo aty ku duhet.
“Ka raste kur kanë pretenduar dhunën, mungesën e autenticitetit të firmës në atë që kanë firmosur shpesh kanë kërkuar avokatë mbrojtës dhe kemi konstatuar shpesh mbrojtje jo efektive nga avokatët që caktohen nga oficerët gjyqësorë ne momentet e para. Këto janë sinjalizime që ne na vijnë shpesh dhe kur përgatita këtë platformë ishte një nga gjerët që më shqetëson më shumë. Se çfarë do kishte kuptim ky sistem ligjor nëse ne s’do jemi në gjendje ti sigurojmë garancitë themelore kur qytetarëve u kufizohet liria?”
Dhe jo vetëm kaq! Shpesh, tha Çela, avokatët nuk janë avokatë.
“Avokatët shpesh s’janë avokatë, vendosin firma aty ku u thuhet të firmosin. Njerëzit izolohen dhe një avokat që s’bën detyrën kjo është shumë e rrezikshme, këto duhet të marrin fund. Shteti ligjor duhet të garantojë të drejtën e qytetarëve. Nga njëra anë të kontrollojmë prokuroret e oficerët e nga ana tjetër mbrojtja të jetë jo informale.
Problemet shtrihen te politika penale, keni dëgjuar që përveç ashpërsimit të dënimeve të ketë masë tjetër penale? I kemi krahasuar me ndonjë vend tjetër të rajonit në BE cilat janë masat e dënimeve që ka kodi shqiptar, a na kanë dhënë rezultatet e pritura?”
Me këtë rast kandidati i tretë për Prokuror të Përgjithshëm tha se prokurorët kanë qenë te ashpër me shtresat e dobëta, kanë thelluar problemet sociale e duke bërë këtë përgatisin breza të rinj që janë në rrugë sot e nesër fidanishte të krimit.
“Këto masat e sigurimit që ne japim vend e pavend e mendojmë çfarë pasojash shkaktojnë te familjet e atyre që izolohen? A ka qenë e nevojshme vërtet që prokurori në çdo rast të shkojë të kërkojë masa ekstreme? A e kemi menduar që ai personi që kërkohet një masë ekstreme ka një familje, fëmijë, punë? Duke qenë të ashpër, dhe me vjen keq ta them, kemi qenë te ashpër me shtresat e dobëta, ne thellojmë problemet sociale e duke bërë këtë përgatisim breza të rinj që janë në rrugë sot e nesër janë fidanishtet e krimit. Prokuroria e policia gjyqësore duhet të ketë një vizion, jo thjesht aplikimi i ashpër i ligjit, të kemi vizion të gjerë mbi shoqërinë. Jemi kthyer në robër të statistikave, sa trajnime ka bërë prokurori, por sa të mirë janë prokurorët pas këtyre trajnimeve?”, tha Olsian Çela
