Kandidati për Kryetar, Kadilli: Nuk ka PD që përjashton!

Partia Demokratike që do drejtoj, do të rishikojë ndarjen administrative, duhet të sfidojmë modelin okupues të partisë, tha Kandidati për Kryetar të PD, Fatbardh Kadilli, duke shpalosur Platformën e tij ndërsa shtoi se i qëndron parimeve në vlerat e konservatorizmit modern.

I pyetur nëse do ta përjashtonte Ish-Presidentin Sali Berisha nga Grupi Parlamentar i Partisë Demokratike, nëse bëhet Kryetar i partisë, ishte i vetmi që deri më sot dha përgjigje të qartë:

“Unë flas për PD të përbashkuar, nuk ka PD që përjashton. Berisha është institucion, nuk është deputet. Është vetë zoti Berisha që vendos distancën e shëndetshme mes institucionit mes PD-së dhe tij, e them këtë duke pasur parasysh se përse e bëni pyetjen!”

Fatbardh Kadilli është i bindur se ka vizionin më të qartë për drejtimin e Partisë Demokratike:

“Jam deklaruar për një PD të pastër. Nuk duhet të kemi forum rinor sa për sipërfaqe. Unë jam për një PD fituese, jam për PD që shndërrohet në lëvizje popullore dhe frymëzon shoqërinë, një forcë politike që ka lidhje të shkurtër me qytetarin. Unë dua të zgjoj individin politik, duhet të jetë forcë politike që nuk zhgënjen, që ka raporte të mira me mediat, në mbrojtje të orientimit perëndimor, duke garantuar hapësirë për çdo individ, që garanton zhvillim të kauzave, zhvillim karriere. Unë jam për një PD të vërtetë. Jam për një PD që ka të njëjtin standard si për veten edhe për kundërshtarin, PD që do drejtoj do të rishikojë ndarjen administrative. Duhet të sfidojmë modelin okupues të partisë, i qëndroj parimeve të mia në vlerat e konservatorizmit modern,” tha Kandidati për Kryetar të PD, Fatbardh Kadilli, duke përfunduar:

“Jemi në një garë e unë kam vizionin më të qartë për drejtimin e partisë, për të ardhmen e ndritur të PD-së.”