Kandidati për President, Kurti: Çështje orësh, do t’i mësojmë të gjitha

Kryeministri i Kosovës, Albin Kurti, nuk ka dhënë një përgjigje konkrete lidhur me kandidatin e mundshëm për president, teksa po hynte në mbledhjen e Grupit Parlamentar të Lëvzijes Vetëvendosje.

I pyetur nga gazetarët nëse kandidate për këtë pozitë është Vjosa Osmani, Kryeministri Kurti tha se është duke shkuar në mbledhjen e grupit parlamentar, ku do të diskutohet çështja e presidentit.

“Besoni që ngapak edhe unë jam kurreshtar po si ju,” tha Albin Kurti i pyetur nga gazetarët se kush është kandidati për President.

Ndërkaq i pyetur për spekulimet rreth emrit të Andin Hotit, Kryeministri Albin Kurti tha shkurt:

“Është çështje orësh kur do t’i mësojmë të gjitha, që të gjithë bashkë”.

Ndërkohë Kryetari i PDK-së, Bedri Hamza, tha se aktualisht nuk ka as kandidat, as marrëveshje për çështjen e presidentit, dhe nuk ka marrë as ftesë për ndonjë takim nga Kryeministri Albin Kurti.

Para hyrjes në mbledhjen e Grupit Parlamentar të PD, Bedri Hamza, sqaroi:

“Nuk kemi kandidat dhe nuk kemi marrëveshje, as ftesë për takim nga Kurti. Ne kemi ofruar një kandidat për president. Nuk është e thënë që ai të jetë nga PDK-ja, mund të jetë edhe jashtë PDK-së, një emër që i përmbush kriteret për këtë pozitë”.