Kandidati “Shtëpisë së lirisë” për Dibrën: Transparencë dhe llogaridhënie për ata që kanë abuzuar!

Kandidati i koalicionit “Shtëpia e lirisë” për Dibrën në zgjedhjet e pjesshme vendore të 6 marsit, Premtim Kryemadhi, sot tha para dibranëve se në këtë mandat të shkurtër nuk premton mrekulli por dy gjëra po: Transparencën e fondeve dhe Llogaridhënie për ata që kanë abuzuar.

Ndërsa lideri historik i PD, Sali Berisha, në tubimin përmbyllës në Dibër tha se vota për Premtim Kryemadhin dhe “Shtëpinë e lirisë” hap rrugën për zgjedhje të parakohshme dhe rikthimin e PD-së në pushtet.

“Kryeministri duhet të na japë llogari se përse në 9 vite nuk i ndërtoi këto 30 kilometra të Rrugës së Arbrit. Ai duhet të përgjigjet edhe për lajmet se do vendosë traun në këtë rrugë. Ai i ka keqqeverisur dibranët dhe i ka vjedhur në këto vite,” tha Premtim Kryemadhi duke shtuar.

“Sot Bashkia e Dibrës është numri një në vend sa i përket borxhit. Është zhytur në borxh dhe infrastruktura e shërbimet mungojnë kudo.”

Nuk premtoi mrekullira para dibranëve por Kandidati i koalicionit “Shtëpia e lirisë” për Dibrën, për dy gjëra u zotua:

“Në këtë mandat të shkurtër nuk premtoj mrekulli, por dy gjëra do premtoj: transparencën e fondeve dhe llogaridhënie për ata që kanë abuzuar. Së dyti, administrata do jetë në shërbimin tuaj. Kjo është kohë e mjaftueshme për të arritur këto gjëra,” tha Kandidati i koalicionit “Shtëpia e lirisë” për Dibrën në zgjedhjet e pjesshme vendore të 6 marsit, Premtim Kryemadhi, duke përfunduar:

“Kandidatët i kam ftuar në një debat publik. Përgjigja të paktën deri më tani ka munguar. U bëj një thirrje që të ulemi dhe të firmosim një pakt, ku cilido prej nesh t’i thotë jo Skavicës. Nëse nuk e firmosin ata këtë pakt, unë do e firmos atë me qytetarët e Dibrës më 6 mars.” 

Me këtë rast Ish-Presidenti Sali Berisha u zotua para dibranëve se nuk do të lejohet projekti i Skavicës që përmbyt Dibrën dhe se nuk do të ketë tra në Rrugën e Arbrit.

“Më 6 mars, Edi Rama vjen për të kërkuar votën tuaj me kandidatin e tij me dy fytyra. Njëra është një fytyrë me të cilën ai ka dëshmuar se jo qytetari, por qeveritari është në epiqendër të interesave të tij. Kurrë më shumë se gjatë qeverisjes së tij nuk është rritur varfëria dhe mjerimi.

Ai ka marrë përsipër t’i bëjë Dibrës atë që nuk ia ka bërë asnjë pushtues: të mbysë nën ujë Dibrën më pjellore, por edhe Dibrën historike, vend-origjinën e Skënderbeut, të mbysë nën ujë dhjetëra e dhjetëra fshatra, përfshi shtëpi dhe varreza. Përse? Për të prodhuar 100 kilovat energji më shumë në Skavicë.

Unë jam marrë jo pak me hidrocentralin e Skavicës, por kam arritur në përfundimin e prerë se ai nuk duhet të ndërtohet kurrë në variantin që përmbyt fshatrat e Dibrës. Ju garantoj se nëse do votoni Premtim Kryemadhin, ai kurrë nuk mund të ndërtojë Skavicën pa qeverinë vendore,” tha Berisha ndërsa kishte dy fjalë dhe për rrugën e Arbrit:

“Ajo duhej të mbaronte në vitin 2015, e ka zgjatur 7 vite vetëm për praktika korruptive. Por të harrojë se do vendosë trau. PD në pushtet nuk do pranojë kurrë tra në Rrugën e Arbrit.

Ndaj votoni Premtim Kryemadhin që të çelim rrugën për zgjedhje të përgjithshme të parakohshme dhe fitoren e PD. Me rikthimin e PD, do rikthehet universiteti. Rama do përfundojë aty ku e kanë vendin autokratët, kurse Dibra do ketë universitetin e saj,” tha lideri hsitorik i PD duke siguruar dibranët se betejën do e fitojë universiteti.

“Një luftë në zemër të Europës po përhapet çdo ditë. Diktatori gjakatar rus ka sulmuar një vend të pavarur dhe të lirë. Tri javë më parë nga Washingtoni, Rama na tha se ai nuk është armiku ynë. I them nga ky shesh se sot ne ndjehemi ukrainas. I shprehim solidaritetin atyre burrave dhe grave që po luftojnë me një diktator gjakatar për dinjitetin dhe lirinë e tyre.

Shqipëria është vend anëtar i NATO-s. Të nesërmen e anëtarësimit në NATO, ai do bënte protestë kundër anëtarësimit. Kurse sot ajo që drejton ministrinë e Jashtme do e quante NATO-n si NATA.

Edhe Ballkani i Hapur është një nismë antishqiptare dhe hapje për influencën ruse në Ballkanin Perëndimor. Me këtë nismë kanë rrethuar Kosovën dhe duan t’ia vështirësojnë jetën,” tha Sali Berisha duke shtuar se çdo votë më 6 mars është votë për Shqipërinë, për Kosovën, në interes të paqes në rajonin tonë.

“Ndaj u bëj thirrje që votat të shkojnë për Premtim Kryemadhin. Asnjë votë për përfaqësuesin e Edi Ramës, që e falimentoi këtë bashki. Por krahas tij kemi edhe kandidatin e Lulzim Bravës. Po i them se je i regjistruar në librin e zi të Dibrës për heshtjen tënde ndaj mbytjes së Dibrës me hidrocentralin e Skavicës dhe bashkimin tënd me Edi Ramën. Sikundër u bëj thirrje: asnjë votë për kandidatin e tij sepse është gjithçka e stisur kundër opozitës së vërtetë, kundër PD-së së vërtetë. Ju bëj thirrje demokratëve të Dibrës, me 6 mars të bashkohemi më shumë se kurrë, nuk u lidh asgjë me Lulzim Bravën dhe kandidatin e tij.”

Në fund, lideri historik i PD, duke bërë thirrje dibranëve të votojnë Premtim Kryemadhin tha të votojnë për të hapur dyert për zgjedhjet e reja të parakohshme dhe rikthimin e PD-së në pushtet.

“U bëj thirrje shqiptarëve kudo që janë, që gjatë këtyre tre ditëve të bëjmë gjithçka që njerëzit të votojnë më 6 mars për kandidatët e Shtëpisë së Lirisë, të votojnë për ndryshimin, të votojnë për fitoren e PD dhe zgjedhjet e reja parlamentare dhe rikthimin në pushtet.”