Kaos në Gazë, Izraeli: Po bombardojmë tunelet! Hamasi: Të gatshëm të përballemi…

Gazetari i BBC nga Gaza, mëngjesin e sotëm tha se aty është një kaos i plotë i cili filloi mbrëmjen e së premtes dhe vazhdon ndërsa palët e përfshira në konflikt janë të vendosura për të vazhduar luftimet pavarësisht rezolutës së Asamblesë së Përgjithshme të OKB që bënë thirrje për vendosjen e menjëhershme të armëpushimit humanitar.

“Në veri të Gazës kishte bombardime në përmasa që nuk i kishim parë më parë. Në spital, shoferët e ambulancave më thanë se nuk komunikojnë dot me njeri, por vetëm drejtonin ambulancën aty ku kishte shërthime,” tha reporteri i BBC duke folur për një panik të përgjithshme në Khan Younis ndërsa njerëzit vazhdojnë të kërkojnë familjarët e tyre, ku as linjat telefonike nuk punojnë. 

Ndërkohë ushtria izraelite sot thotë se avionët luftarakë kanë bombarduar tunelet e Hamasit dhe bunkerët nëntokësorë në veri të Rripit të Gazës, duke paralajmëruar një përshkallëzim të mëtejmë të fushatës për të shtypur grupin militant palestinez që sulmoi jugun e Izraelit tre javë më parë.

Avionët izraelitë, thotë IDF, kanë vrarë shefin e forcave ajrore të Hamasit, i cili ka marrë pjesë në planifikimin e sulmeve më 7 tetor.

“Asem Abu Rakaba ishte përgjegjës për dronët e Hamasit, shpërthimet dhe mbrojtjen nga ajri, thekson IDF përmes komunikatës duke shtuar:

“Ka marrë pjesë në planifikimin e masakrës në bashkësitë përreth Rripit të Gazit më 7 tetor. Ka drejtuar terroristët që janë infiltruar në Izrael dhe ishte përgjegjës për sulmet me dron ndaj pozicioneve të IDF.”

Hamas: Jemi të gatshëm të përballemi me forcat izraelite

Përkundër kësaj situate, Hamas u shpreh sot se luftëtarët e tij në Gazë janë të gatshëm të përballen me të gjitha foircat pasi ushtria izraelite ka zgjeruar sulmet ajrore dhe tokësore ndërsa ka saktësuar se luftimet në kufi me Izraelin vazhdojnë.

Sipas kompanive palestineze të telekomunikacionit dhe Gjysmëhënës së Kuqe, deri mëngjesin e sotëm ishin ndërprerë lidhjet telefonike dhe të internetit si rezultat i bombardimeve izraelite, ndërprerje që kanë zgjatë për 12 orë.

Ndryshe, forcat ajrore dhe tokësore izraelite zgjeruan sulmet e tyre ndaj Hamasit në Rripin e Gazës njoftoi mbrëmjen e së premtes ushtria izraelite, dhe grupi militant palestinez konfirmoi se luftëtarët e tij po shkëmbenin zjarr me forcat izraelite përgjatë kufirit.

Ndërkohë Asambleja e Përgjithshme e OKB-së miratoi me shumicë dërrmuese një rezolutë të hartuar nga vendet arabe ku bëhet thirrje për vendosjen e menjëhershme të armëpushimit humanitar dhe kërkohet qasje për organizatat e ndihmave në territorin e rrethuar, si dhe mbrojtja për civilët.