Kardinali italian lexoi emrat e fëmijëve të vrarë në Gaza. Iu deshën shtatë orë

Presidenti i Konferencës Ipeshkvnore të Italiasë, Kardinali Matteo Zuppi, drejtoi një vigjilje prekëse lutjeje, në prag të festës së të Ngjiturit të Zojës së Bekuar në Qiell, në të cilën u lexuan emrat e të gjithë fëmijëve të vrarë në konfliktin midis Izraelit dhe Hamasit që nga fillimi i luftës dy vjet më parë.

Shtatë orë lutje për 12,227 fëmijë të vrarë

Gjatë vigjiljes së gjatë, Kardinali Zuppi dhe dhjetëra anëtarë të dioqezës së tij lexuan me radhë emrat dhe moshat e 16 fëmijëve izraelitë të vrarë në një sulm të Hamasit më 7 tetor 2023, dhe 12.211 emrat e fëmijëve palestinezë të vrarë në pushtimin izraelit të Gazës deri më 25 korrik 2025.

Lista e emrave, në 469 faqe, u përpilua bazuar në të dhënat nga qeveria izraelite për viktimat izraelite dhe të dhënat nga Ministria e Shëndetësisë e Gazës për viktimat palestineze.

“Po i shqiptojmë emrat e tyre një nga një,” tha Zuppi në fillim të vigjiljes. “Ata na kërkojnë të gjithëve të angazhohemi për të gjetur ose ndjekur rrugën e paqes me më shumë inteligjencë dhe pasion, duke filluar me një armëpushim dhe duke ofruar kushtet për të, nga lirimi i pengjeve deri te mosmbajtja peng e një populli të tërë.”

Leximi i emrave të fëmijëve të vrarë zgjati pothuajse shtatë orë. Vigjilja filloi në pasdite dhe zgjati deri në mbrëmje.

Vigjilja e lutjes u mbajt në parkun Monte Sole di Marzabotto, jo shumë larg Bolonjës, në një vend me simbolikë të fortë. Ngjarja u zhvillua në rrënojat e kishës Casaglia, e cila u dogj nga nazistët gjatë masakrës në të cilën u vranë pothuajse 800 njerëz, përfshirë fëmijë, midis 29 shtatorit dhe 5 tetorit 1944.

Ndryshe, Kardinali Matteo Zuppi, i cili u emërua nga Papa Françesku si i dërguar i paqes për Ukrainën, është i njohur për ndërmjetësimin e tij në shkëmbimin e pengjeve midis Rusisë dhe Ukrainës.

Gjatë konklavës në të cilën u zgjodh Papa Leo XIV, Matteo Zuppi u konsiderua si një nga kandidatët e mundshëm për papë.