Kartëvizitat shqiptare për turizmin – Festivalet verore

Shqipëria ka potencialin të zhvillohet si një destinacion turistik tërheqës përmes festivaleve verore që organizon. Festivalet e muzikës, kulturës dhe artit janë një mënyrë e shkëlqyer për të promovuar turizmin në vend dhe për të tërhequr vizitorë nga jashtë.

Në këtë rast, marketingu i realizuar përmes instancave shtetërore si Agjenci Turizmi Kombëtare, ashtu si operatorë privatë të ofrimit të paketave e pushimeve në vend, po ashtu dhe fuqia e mediave sociale, do të sillnin një kartolinë të plotë se çfarë mund të bëjnë eventet për turizmin.

Në vitet e fundit, është rritur interesi për festivalet verore në Shqipëri. Këto evenimente ofrojnë një kombinim të muzikës, performancave, gastronomisë dhe kulturës vendase, duke krijuar një përvojë unike për vizitorët.

Disa prej festivaleve më të njohura në Shqipëri janë Festivali i Këngës në Kukës, Festivali i Këngës Popullore në Gjirokastër, Festivali i Gjirokastrës, Festivali i Butrintit, Festivali i Kalamarës në Vlorë, dhe shumë të tjerë.

Këto festivale ofrojnë muzikë të gjallë, performanca artistike, tregtim dhe promovim të produkteve vendase dhe aktivitete të tjera kulturore.

Ka edhe festivale muzikore të tjera, siç është “UNUM Festival” në Shëngjin, “Soundwave Albania” në Dhërmi, dhe “Parku i Skeletave” në Tiranë, të cilat janë tërheqëse për turistët që kërkojnë muzikë të gjallë dhe argëtim.

Një nga festivalet më të njohura dhe më të suksesshme është “Kala Festival” që zhvillohet në Gjirin e Himarës.

Ky festival ka fituar një reputacion të mirë për muzikën e kualitetit të lartë dhe ambientin e tij të mrekullueshëm buzë detit Jon. Po ashtu një tjetër organizim, para sezonit veror ishte ai SouthDoor Festival. Bashkë me muzikën, festën, gëzimin, këto evente shoqërohen edhe me problematika.

Sipas drejtuesve artistikë të kontaktuar, këto problematika duhet të adresohen, në mënyrë të tillë që eksperienca e turistëve, qoftë vendas apo të huaj, të jetë pozitive dhe me gjasa për t’u rikthyer.

Planifikoni më parë: Organizatorët, bashkë me Bashkitë lokale duhet të nisin planifikimin e festivalit shumë kohë përpara datës së tij.

Kjo përfshin identifikimin e vendit, hartimin e programit, sigurimin e artistëve, rezervimin e akomodimeve dhe të gjitha aspektet e nevojshme për të organizuar një festival të suksesshëm.

Lajmërimet për eventin nuk mund të bëhen disa ditë para fillimit pasi mundësia që të tërheqë vizitorë, si vendas apo rajonalë, është e ulët. Njerëzit duhet të planifikojnë kohën e tyre të lirë.

Promovoni festivalin: Një promovim i mirëfilltë është thelbësor për të tërhequr turistët.

Përdorni kanale të ndryshme promovimi, duke përfshirë mediat sociale, faqe interneti, lajme të vendit dhe të huaj dhe afishe në qytetet e tjera për të njoftuar audiencën potenciale për festivalin tuaj.

Mediat sociale, në veçanti, kanë potencialin për të tërhequr turistë përtej kufijve.

Siguroni infrastrukturën e duhur: Sigurohuni që vendi i festivalit të ketë infrastrukturën e nevojshme për të pritur audiencën. Kjo përfshin ndriçim të mjaftueshëm, ujë, tualetet e mjaftueshme dhe kapacitet për të pritur numrin e parashikuar të njerëzve.

South Door Fest, një organizim shumë i bukur për nga natyra e festivalit pati problematika mëngjesin e natës së fundit, duke qenë se strukturat akomoduese në Borsh nuk ishin të përgatitura për fluksin për ushqim dhe fjetje.

Kontrolloni çështjet e logjistikës: Sigurohuni që të keni planifikuar logjistikën e duhur për të menaxhuar fluksin e njerëzve, parkimin, sigurinë dhe të gjitha aspektet teknike të festivalit.

Mjedis i pastër dhe mbrojtje: Kujdesuni për ruajtjen e mjedisit dhe pastërtinë gjatë festivalit. Mundohuni të përdorni materiale të riciklueshme dhe të qëndrueshme për mjedisin.

Organizatorët duhet të menaxhojnë edhe situata si mushkonjat, një përgatitje disa ditë më parë përmes formave të dezinsektimit mund të shpëtojë dhjetëra turistë të bezdisur, siç raportohet në Shëngjin gjatë eventit UNUM.

Muzika nxit vlerë ekonomike

Një ekonomi e gjallë muzikore nxit vlerën për qytetet në disa mënyra të rëndësishme. Ajo krijon vende pune, rrit ekonominë, zhvillon turizmin dhe forcon markën e një qyteti.

Një komunitet i fortë muzikor tërheq edhe punëtorë të rinj shumë të aftë në të gjithë sektorët, për të cilët cilësia e jetës është përparësi. Kjo nga ana tjetër tërheq investimet e biznesit.

Shumë prej tyre e vlerësojnë rolin e muzikës për ekonomitë lokale.

Një rast i njohur 18 vitet e fundit është Festa e Birrës në Korçë. Për çdo festival muzikor ose ngjarje “live”, komuniteti lokal afër një vendi mund të ketë ndikime pozitive dhe negative.

Përfitimet ekonomike për komunitetin lokal mund të jenë të rëndësishme, por duhet të kompensohen nga pranimi i ndikimeve të tjera, si bllokimi i trafikut dhe rritja e ndotjes.

Përfitimet financiare për bizneset lokale gjatë një koncerti shumëditor zakonisht do të kapërcejnë çdo kundërshtim nga banorët vendas dhe kjo është një arsye kryesore për autoritetet lokale në dhënien e licencave të nevojshme për vijimin e një festivali.

Megjithatë, me rritjen e fokusit në qëndrueshmërinë mjedisore, ndikimi i fluksit të vizitorëve duhet të menaxhohet me kujdes.

Përdorimi i parqeve publike në zonat urbane për organizime dhe koncerte në shkallë të gjerë mund të sjellë përfitime të mëdha për bizneset e komunitetit lokal, si dhe organizatorët e ngjarjeve dhe vizitorët./Monitor/

Vlerësimet e Statista Market Insights

Sipas vlerësimeve të Statista Market Insights, e gjithë industria e eventeve muzikore, duke përfshirë festivalet dhe koncertet, por edhe muzikalët dhe operat, pritet të kthehet në trajektoren e saj të rritjes para pandemisë këtë vit.

Statista pret që shitjet e biletave në internet për shfaqjet e lidhura me muzikën të arrijnë në 33.8 miliardë dollarë këtë vit, 65% më shumë nga viti 2022 dhe 49% nga 2019, viti i fundit para pandemisë.

Meqenëse vlerësimet e Statista bazohen në vlerën bruto të mallit, ato përfaqësojnë atë që konsumatorët paguajnë për biletat në një vit të caktuar, pavarësisht se si shpërndahen ato para midis organizatorëve, artistëve dhe platformave të biletave në internet.

Pas rritjes së platformave të transmetimit të muzikës, të cilat janë famëkeqe, sepse nuk u paguajnë artistëve pjesën e tyre të drejtë, shfaqjet live janë bërë burimi më i rëndësishëm i të ardhurave për shumë artistë, kjo është arsyeja pse kriza Covid përbënte një kërcënim ekzistencial për shumë prej tyre.