KAS që Duam/ Përfundon rinumërimi në Durrës, LSI nuk siguron mandatin madje humb edhe 1 votë!

Partia Socialiste ka humbur 26 vota, Partia Demokratike 38 ndërsa Lëvizja Socialiste për Integrim ka humbur 1 votë, është ky rezultati i rinumërimit të 108 kutive të Qarkut të Durrësit, të kontestuar nga Lëvizja Socialiste për Integrim në Komisionin e Ankimimeve dhe Sanksioneve, KAS, i cili më pas miratoi Tabelën Përmbledhëse të Rezultateve për Qarkun Durrës.

“Riçelim seancën për kërkesën ankimore të LSI, për rinumërimin e Qarkut Durrës. Në përfundim të procesit për 108 qendrat e numëruara, rezulton që LSI ka minus 1 votë më pak, PD, minus 38 vota dhe PS, minus 26 vota nga rivlerësimi i bërë nga grupet e numërimit,” thekson vendimi i KAS i cili nuk e ndihmon Lëvizjen Socialiste për Integrim ta fitoj mandatin i cili ndahej me vetëm 136 vota nga Partia Socialiste.

Pasi përfundoi shqyrtimin administrativ të kërkesës ankimore nr. 46, me objekt “Ndryshimin e vendimit të KSHZ nr.340, datë 04.05.2021 “Për Miratimin e tabelës përmbledhëse për rezultatin e votimit, qarku Durrës’; Rinumërim dhe rivlerësimin e votave për të gjitha ZAZ e qarkut Durrës”, me ankues Partia Lëvizja Socialiste për Integrim, për zonën zgjedhore qarku Durrës, Komisioni i Ankimimeve dhe Sanksioneve vendosi ndryshimin e vendimit nr. 340, të datës 04.05.2021 të Komisionerit Shtetëror të Zgjedhjeve dhe miratimin e Tabelës Përmbledhëse të Rezultatit të zgjedhjeve të zonës zgjedhore qarku Durrës sipas rezultatit të dalë nga rinumërimi i 108 kutive të votimit për votat e subjekteve zgjedhore të kërkuara nga LSI.

Ndryshe, PD dhe LSI nëpërmjet përfaqësuesve të tyre në KAS kërkuan ripërsëritjen e zgjedhjeve në Qarkun e Durrësit, pasi sipas tyre ka pasur disa parregullsi e është deformuar vullneti i qytetarëve.