KAS rrëzon kërkesën e “Lëvizja Bashkë”, Qori: Do ta ankimojmë në Kolegj Zgjedhor!

Komisioni i Ankimimeve dhe Sanksioneve, KAS, sot rrëzoi kërkesën e “Lëvizja Bashkë” për regjistrimin në zgjedhjet vendore 2023.

Duke e cilësuar vendimin e KAS politik, kreu i “Lëvizja Bashkë”, Arlind Qori, tha se do ta ankimojmë këtë vendim në Kolegjin Zgjedhor dhe paralelisht do të vijojnë me mbledhjen e firmave për t’u regjistruar në këto zgjedhje si kandidat i pavarur.

“Pse nuk duan t’ia dinë për argumentet, për ligjin, për Kodin Zgjedhor. Ata kanë frikë nga një lëvizje politike e vërtetë, nga njerëz të organizuar dhe me idealet. Ata e dinë se sa shumë na presin qytetarët. Ne do ta ankimojmë këtë vendim në Kolegjin Zgjedhor dhe paralelisht do të vijojmë me mbledhjen e firmave. Sot në këtë ditë festë do të thyejmë rekordin e firmave të mbledhura për Lëvizjen Bashkë dhe për mua si kandidat i pavarur,” tha Arlind Qori bindur se asnjë i korruptuar nuk do ti pengoj ndërsa përfundoi:

“Ata që na pengojnë ne nuk kanë as minimumin e argumenteve ligjore. Ne kemi institucionet e korruptuara kundër por kemi pro ligjin dhe popullin e Shqipërisë.”

Ndryshe, Komisioni i Ankimimeve dhe Sanksioneve shqyrtoi kërkesën ankimore nr. 30, të depozituar në KQZ nga partia “Lëvizja Bashkë”. Ankimimi i partisë “Lëvizja Bashkë” kishte si objekt kundërshtimin e vendimit nr. 157, datë 09.03.2023 të Komisionerit Shtetëror të Zgjedhjeve për “Mosregjistrimin si subjekt zgjedhor të partisë politike ‘Lëvizja Bashkë’, në zgjedhjet për organet e qeverisjes vendore të datës 14 maj 2023”.

Në përfundim të shqyrtimit, me shumicë votash, KAS vendosi rrëzimin e kërkesës së partisë “Lëvizja Bashkë” dhe lënien në fuqi të vendimit të Komisionerit Shtetëror të Zgjedhjeve.