Kastratit i zgjatet koncesioni Aeroportit 35 vjet, reagon Basha: Do tu kthehet shqiptarëve!

Pas publikimit të Projektligjit për marrëveshjen e kalimit të koncesionit të Aeroportit Ndërkombëtar “Nënë Tereza” në pronësi të “Kastrati Group”, ku parashikohet zgjatja e koncesionit nga 22 në 35 vjet, ka reaguar Kryetari i Partisë Demokratike, Lulzim Basha duke u zotuar se Ai dhe qeveria e tij nuk do të njohin asnjë akt të tillë dhe do ta zhbëjnë ndërsa Aeroporti do tu kthehet shqiptarëve.

“Çdo akt koncesioni, PPP apo zgjatje koncesioni i propozuar nga qeveria ne ikje, është në shkelje flagrante të ligjeve të vendit. Zotohem para çdo shqiptari se unë dhe qeveria ime nuk do të njohim asnjë akt të tillë dhe do ta zhbëjmë atë,” thekson Lulzim Basha në reagimin e tij përmes rrjetit social Twitter duke garantuar qytetarët shqiptarë:

“Aeroporti Ndërkombëtar “Nënë Tereza” do tu kthehet shqiptarëve dhe shtetit të tyre sipas përcaktimeve fillestare të kontratës koncesionare. Shqipëria do tu kthehet shqiptarëve!”

Ndryshe, në Parlament ka mbërritur Drafti i cili zyrtarizon kalimin e Aeroportit Ndërkombëtar “Nënë Tereza” në pronësi të “Kastrati Group”, ku parashikohet zgjatja e marrëveshjes së koncesionit nga 22 në 35 vjet, si dhe investime në modernizimin dhe rritjen e cilësisë së shërbimeve në Aeroport.

Projektligji për marrëveshjen e kalimit të koncesionit te Kastrati parashikon përmirësimin dhe zgjatimin e pistës së Aeroportit, zgjerimin e terminalit si dhe investime të tjera me vlerë 99 milionë euro, ndërsa reduktim i tarifave është parashikuar për për të rritur 20% dhe 40% për fëmijë.