Katastrofa nga përmbytjet, PD: Qeveria të marrë përgjegjësi, dëmshpërblim banorëve dhe bizneseve!
Duke denoncuar situatën katastrofike nga përmbytjet ku banorët raportojnë se janë të izoluar në banesat e tyre të përmbytura dhe me dëme të mëdha materiale, ndërsa instancat shtetërore nuk u përgjigjen telefonatave për ndihmë, Partia Demokratike përmes zëdhënëses së Antikorrupsionit në PD, Genta Vangjeli, kërkon që Qeveria të marrë përgjegjësi të plotë për dëmshpërblimin e banorëve dhe bizneseve të prekura, Ministri i Mbrojtjes, Pirro Vengu, të japë dorëheqjen, ndërsa organet e hetimit të nisin hetimet për penalizimin e gjithë përgjegjësve të kësaj situate të paralajmëruar.
“Gjendja e qytetarëve të përmbytur në Tiranë, Durrës, Lezhë, Gjirokastër, Vlorë, Cërrik, Elbasan, Pogradec e jo vetëm është alarmante dhe tejet e mjerueshme. Banorët raportojnë se janë të izoluar në banesat e tyre, të përmbytura dhe me dëme të mëdha materiale.
Mbi të gjitha, instancat shtetërore nuk u përgjigjen telefonatave për ndihmë. Askush, përveç gazetarëve, nuk shkon për t’u interesuar për gjendjen e tyre,” shprehet Genta Vangjeli duke tehksuar se prej disa ditësh, qytetet e Shqipërisë ndodhen nën pushtetin e ujit, dhe, asnjë masë parandaluese nuk u mor, ndonëse reshjet e dendura ishin paralajmëruar.
Në fund, thekson zëdhënësja e Antikorrupsionit në PD, fatura e kësaj paaftësie dhe papërgjegjshmërie i shkon gjithmonë qytetarëve.
“Ligji është i qartë prandaj Partia Demokratike kërkon shpalljen e gjendjes së jashtëzakonshme në zonat e përmbytura. Shteti duhet të marrë përgjegjësi të plotë për dëmshpërblimin e banorëve dhe bizneseve të prekura. Shqipëria nuk qeveriset me propagandë, por me veprime konkrete,” shprehet zëdhënësja e Antikorrupsionit në PD, Genta Vangjeli, duke përfunduar:
“Ministri i Mbrojtjes, Pirro Vengu, duhet të japë dorëheqjen, ndërsa organet e hetimit duhet të nisin hetimet për penalizimin e gjithë përgjegjësve të kësaj situate të paralajmëruar, të cilët me veprimet apo mosveprimet lejuan krijimin e kësaj gjendjeje katastrofike, me pasoja të rënda deri në humbjen e jetëve njerëzore nga përmbytjet.”
Deklarata:
Dy ditë më parë, Ministri i Mbrojtjes, Pirro Vengu, mblodhi Komitetin Ndërministror të Emergjencave Civile për të diskutuar situatën e krijuar nga reshjet intensive të shiut gjatë ditëve të fundit.
Por cili është rezultati konkret i kësaj mbledhjeje?
Gjendja e qytetarëve të përmbytur në Tiranë, Durrës, Lezhë, Gjirokastër, Vlorë, Cërrik, Elbasan, Pogradec e jo vetëm është alarmante dhe tejet e mjerueshme. Banorët raportojnë se janë të izoluar në banesat e tyre, të përmbytura dhe me dëme të mëdha materiale, duke u shkatërruar mundi dhe sakrificat e shumë viteve pune.
Mbi të gjitha, instancat shtetërore nuk u përgjigjen telefonatave për ndihmë. Askush, përveç gazetarëve, nuk shkon për t’u interesuar për gjendjen e tyre.
Prej disa ditësh, qytetet e Shqipërisë ndodhen nën pushtetin e ujit. Vetëm tre muaj më parë ndodhi një tjetër përmbytje dhe, edhe këtë herë, asnjë masë parandaluese nuk u mor, ndonëse reshjet e dendura ishin paralajmëruar.
Si çdo herë, pushtetarët e kësaj qeverie, sapo bie shi, veshin çizmet e propagandës dhe shëtisin nëpër pseudo-inspektime, ndërkohë që realiteti për qytetarët është katastrofik. Masat parandaluese munguan plotësisht dhe reagimi erdhi vetëm pasi dëmi ishte bërë.
Kanale dhe pusetat vijojnë të jenë të bllokuara, si pasojë e mungesës së investimeve serioze për ujërat e bardha, pavarësisht se miliona euro janë shpenzuar për hidrovorë që sot rezultojnë të paaftë për të përballuar situatën.
Në fund, fatura e kësaj paaftësie dhe papërgjegjshmërie i shkon gjithmonë qytetarëve.
Ligji është i qartë prandaj Partia Demokratike kërkon shpalljen e gjendjes së jashtëzakonshme në zonat e përmbytura.
Shteti duhet të marrë përgjegjësi të plotë për dëmshpërblimin e banorëve dhe bizneseve të prekura.
Shqipëria nuk qeveriset me propagandë, por me veprime konkrete.
Ministri i Mbrojtjes, Pirro Vengu, duhet të japë dorëheqjen, ndërsa organet e hetimit duhet të nisin hetimet për penalizimin e gjithë përgjegjësve të kësaj situate të paralajmëruar, të cilët me veprimet apo mosveprimet lejuan krijimin e kësaj gjendjeje katastrofike, me pasoja të rënda deri në humbjen e jetëve njerëzore nga përmbytjet.
