Katër persona dënohen me 22.5 vjet burg për përfshirje në vrasjen e Oliver Ivanoviçit
Gjykata Themelore në Prishtinë ka dënuar me 22 vjet e gjashtë muaj burgim katër të akuzuarit në rastin e vrasjes së politikanit serb, Oliver Ivanoviç.
Gjykata të akuzuarit Nedeljko Spasojviç i ka shqiptuar dënim me burgim prej 4 vite e 6 muajsh. Të njëjtit do t’i llogaritet edhe koha kur ka qëndruar në paraburgim dhe burgim shtëpiak. Të njëjtit i shqipton edhe gjobë prej 4 mijë e 500 eurosh.
Të akuzuarin Marko Roshiç për veprën penale, pjesëmarrje ose organizim i grupit kriminal të organizuar lidhur me veprën penale, vrasje e rëndë, i shqipton dënim me burgim në kohëzgjatje prej 10 vitesh.
Gjykata të akuzuarit po ashtu i shqipton dënim me gjobë prej 10 mijë eurove. Të akuzuarit Dragisha Markoviç për veprën penale bashkëkryerje dhe keqpërdorim i pozitës i shqipton dënim me burgim prej 4 vitesh.
Të akuzuarit Zharko Jovanoviç për veprën penale bashkëkryerje dhe keqpërdorim të pozitës i shqipton dënim prej 4 vitesh. Po ashtu i shqipton dënim me gjobë në shumë prej 1 mijë e 500 eurove.
Tomë Gashi, avokat mbrojtës i të pandehurit Rade Basara, i cili është liruar nga akuzat, ka theksuar se vendimi i gjykatës është në përputhje me ligjin, por ka kundërshtuar dënimin me gjobë për veprën penale, që lidhet me posedim të armëve të ndryshme, të katër të akuzuarve në rastin e vrasjes së Oliver Ivanoviqit.
Gashi tha se në mesin e të akuzuarve ka edhe ish-policë, e që sipas tij, për vepra kaq të rënda nuk do të duhej të shqiptohej vetëm dënim me gjobë.
“Vendimi i gjykatës për dënimin e shqiptuar ka qenë në përputhje me ligjin. Por është e çuditshme që janë dënuar për vepra penale të rënda vetëm me gjobë. Një situatë e tillë nuk është normale. Policëve mund të ju mjaftojnë vetëm armët. Kjo i stimulon tjerët të mbajnë armë pa leje,” tha avokat Tomë Gashi.
Ndryshe, Oliver Ivanoviç është vrarë më 16 janar të vitit 2018, para objektit të partisë së tij në Mitrovicë të Veriut.
Në rastin e vrasjes së Ivanoviçit, Prokuroria përfshin edhe ish-shef i operacioneve të Policisë së Kosovës për rajonin e veriut, Zhelko Bojiç, ish-nënkryetarin e Listës Srpska, Milan Radoiçiç, dhe biznesmenin nga veriu i Kosovës, Zvonko Veselinoviç.
Por, kundër tyre nuk është ngritur ndonjë akuzë në Kosovë, për shkak se janë në arrati.
